ទំនាក់ទំនង សំណួរអតិថិជនសំណួរអតិថិជន អំពីសេវាធនាគារអេឡិចត្រូនិក

សំណួរអតិថិជន អំពីសេវាធនាគារអេឡិចត្រូនិក

នៅក្នុងទំព័រនេះ យើងខ្ញុំមានក្តីសោមនស្សសូមបង្ហាញជូនលោកអ្នកនូវចម្លើយចំពោះសំណួរទាំងឡាយដែលអតិថិជនបានសួរជាញឹកញាប់ ។

សូមចុចលើសំណួរនៅខាងក្រោម ដើម្បីមើលចម្លើយ ។ យើងខ្ញុំសង្ឃឹមថា ចម្លើយទាំងនោះមានសារប្រយោជន៍និងផ្តល់ជាព័ត៌មានសម្រាប់លោកអ្នក ។ ក្នុងករណីប្រសិនបើមិនមានចម្លើយដែលលោកអ្នកកំពុងស្វែងរកនៅក្នុងទំព័រនេះទេ ឬមានសំណូមពរនានា ដែលអាចផ្តល់នូវអត្ថប្រយោជន៍តាមបំណងរបស់លោកអ្នក សូមមេត្តាផ្តល់ព័ត៌មានមកយើងខ្ញុំដើម្បីបម្រើជូនលោកអ្នកឱ្យកាន់តែប្រសើរ ។

សេវាអេស៊ីលីដាយូនីធី

តើសេវាអេស៊ីលីដាយូនីធីជាអ្វី ?
សេវាអេស៊ីលីដាយូនីធី គឺជាការផ្តល់សេវាហិរញ្ញវត្ថុជូនអតិថិជនក្នុងសហគមន៍តាមរយៈទូរស័ព្ទចល័តគ្រប់ប្រព័ន្ធទាំងអស់ ។ សេវានេះធ្វើឱ្យមានការប្រមូលផ្តុំ និងបង្រួបបង្រួមអតិថិជន ពីគ្រប់មជ្ឍដ្ឋានឱ្យស្ថិតនៅក្នុងគ្រឹះស្ថានហិរញ្ញវត្ថុតែមួយ ហើយបង្កលក្ខណៈងាយស្រួលដល់ការធ្វើប្រតិបតិ្តការធនាគារប្រចាំថ្ងៃប្រព្រឹត្តទៅប្រកបដោយសុវត្ថិភាព នៅគ្រប់ទីកន្លែងទាំងក្នុង និងក្រៅប្រទេស មិនចាំបាច់ធ្វើដំណើរទៅកាន់ការិយាល័យធនាគារឡើយ (ដែលក្នុងនោះរួមទាំងការដកប្រាក់តាមម៉ាស៊ីនអេធីអឹម អេស៊ីលីដា ដោយមិនប្រើប័ណ្ណអេស៊ីលីដា) ។
តើសេវាអេស៊ីលីដាយូនីធីផ្តល់អត្ថប្រយោជន៍អ្វីខ្លះ ?
សេវាអេស៊ីលីដាយូនីធីផ្តល់អត្ថប្រយោជន៍ជូនលោកអ្នក ដូចខាងក្រោម ៖
- ងាយស្រួលក្នុងការប្រើប្រាស់ គឺដូចជាការប្រើប្រាស់ទូរស័ព្ទធម្មតា ។
- ងាយស្រួលក្នុងការផ្ទេរប្រាក់ ឬធ្វើការទូទាត់ទឹកប្រាក់ឱ្យដៃគូបានភ្លាមៗ ។ ឧទាហរណ៍ ៖ លោកអ្នកទិញទូរទស្សន៍មួយគ្រឿង តម្លៃ ៥០០ដុល្លារអាមេរិក លោកអ្នកអាចទូទាត់ជូនអ្នកលក់បានភ្លាមតាមទូរស័ព្ទ ដោយមិនចាំបាច់ទៅដកប្រាក់ពីធនាគារ ឬប្រើសាច់ប្រាក់សុទ្ធយកមកទូទាត់ឡើយ ។
- អាចធ្វើប្រតិបត្តិការធនាគារបានគ្រប់ទីកន្លែង គ្រប់ពេលវេលា នៅពេលមានតម្រូវការ ។ ឧទាហរណ៍ ៖ លោកអ្នកមានធុរៈ ធ្វើដំណើរទៅឆ្ងាយពីទីលំនៅ ការិយាល័យ ឬទៅក្រៅប្រទេស លោកអ្នកនៅតែអាចធ្វើការផ្ទេរប្រាក់ ឬទូទាត់ប្រាក់ជូនដៃគូ ឬពិនិត្យមើលរបាយការណ៍គណនីសង្ខេប ឬពិនិត្យមើលអត្រាប្តូរប្រាក់... ពីទូរស័ព្ទដៃរបស់លោកអ្នក ។
- អាចចាត់ចែងសាច់ប្រាក់ និងត្រួតពិនិត្យចរន្តសាច់ប្រាក់បានដោយខ្លួនឯង គឺអ្នកអាចដឹងអំពីលំហូរសាច់ប្រាក់ ចេញចូលបាន ។
- ធ្វើប្រតិបត្តិការធនាគារដោយខ្លួនឯង និងចំណេញពេលវេលា ។ លោកអ្នកមិនចាំបាច់ទៅការិយាល័យធនាគារ មិនមានការបំពេញឯកសារ និងមិនមានការរង់ចាំ ។
- ក្លាយជាមនុស្សទាន់សម័យនៅក្នុងសង្គម ដោយទទួលបានការយល់ដឹងបន្ថែម ទាក់ទងនឹងការវិវឌ្ឍផ្នែកបច្ចេកវិជ្ជា ។
- មានឱកាសប្រើប្រាស់ផលិតផលនិងសេវាកម្មផ្សេងៗរបស់ធនាគារក្នុងពេលដំណាលគ្នា ។
តើធ្វើដូចម្តេចទើបអាចចុះឈ្មោះប្រើប្រាស់សេវាអេស៊ីលីដាយូនីធីបាន ?
លោកអ្នកគ្រាន់តែ ៖
- អញ្ជើញមកកាន់ការិយាល័យធនាគារអេស៊ីលីដា ដែលនៅជិតលោកអ្នក ដើម្បីបំពេញពាក្យស្នើសុំប្រើប្រាស់សេវាអេស៊ីលីដាយូនីធី
- ភ្ជាប់មកនូវអត្តសញ្ញាណប័ណ្ណសញ្ជាតិខ្មែរ លិខិតឆ្លងដែន ឬឯកសារផ្សេងៗដែលមានសុពលភាព
- អាចមាន ឬគ្មានគណនីជាមួយធនាគារអេស៊ីលីដា
- យកមកជាមួយនូវទូរស័ព្ទដៃ (ព្រមទាំងលេខទូរស័ព្ទ) ។
តើខ្ញុំអាចធ្វើប្រតិបត្តិការសេវាអេស៊ីលីដាយូនីធីតាមមធ្យាបាយអ្វីខ្លះ ?
លោកអ្នកអាចជ្រើសរើសមធ្យោបាយណាមួយ ក្នុងចំណោមមធ្យោបាយខាងក្រោម ៖
- ការផ្ញើ និងទទួលព័ត៌មានគណនី តាមរយៈការផ្ញើសារ
- តាមរយៈ USSD, Web Browser ឬតាម Application download
តើមានការបង្ហាញពីរបៀបប្រើប្រាស់សេវាអេស៊ីលីដាយូនីធី ដែរឬទេ ?
លោកអ្នកអាចទស្សនា និងអនុវត្តពីរបៀបប្រើបាស់សេវាអេស៊ីលីដាយូនីធី ដោយចុចទីនេះ ។
តើប្រភេទទូរស័ព្ទណាខ្លះដែលអាចភ្ជាប់សេវាអេស៊ីលីដាយូនីធីបាន ?
ទូរស័ព្ទចល័តស្ទើរតែគ្រប់ប្រភេទ គ្រប់ម៉ាក និងគ្រប់ប្រព័ន្ធអាចភ្ជាប់សេវាអេស៊ីលីដាយូនីធីបាន ។
តើធ្វើដូចម្តេចទើបអាចដឹងថា ទូរស័ព្ទអាចប្រើ WAP ឬ Application ?
សូមចុចទីនេះ ដើម្បីមើលតារាងទូរស័ព្ទដែលបានចុះឈ្មោះប្រើប្រាស់សេវាអេស៊ីលីដាយូនីធី ឬអញ្ជើញមកកាន់ការិយាល័យធនាគារអេស៊ីលីដា ដែលនៅជិតលោកអ្នក សម្រាប់តម្រូវការប្រើប្រាស់សេវាធនាគារ និងព័ត៌មានផ្សេងៗទៀត ។
តើធនាគារគិតថ្លៃសេវាអេស៊ីលីដាយូនីធី យ៉ាងដូចម្តេច ?
សូមចុចទីនេះ ឬទាក់ទងធនាគារអេស៊ីលីដា ដែលនៅជិតលោកអ្នក ឬក៏ទាក់ទងមកការិយាល័យទំនាក់ទំនងអតិថិជន តាមរយៈទូរស័ព្ទលេខ ៖ ០២៣ ៩៩៤ ៤៤៤ ឬ ០១៥ ៩៩៩ ២៣៣ ។
តើការប្រើប្រាស់សេវាអេស៊ីលីដាយូនីធីមានសុវត្ថិភាពឬទេ ?
ការប្រើប្រាស់សេវាអេស៊ីលីដាយូនីធី គឺមានសុវត្ថិភាពខ្ពស់មួយរយភាគរយ ។
តើខ្ញុំអាចប្រើសេវាអេស៊ីលីដាយូនីធីនៅក្រៅប្រទេសបានដែរ ឬទេ ?
លោកអ្នកអាចប្រើសេវាអេស៊ីលីដាយូនីធីនៅក្រៅប្រទេសបាន ឱ្យតែទូរស័ព្ទរបស់លោកអ្នកភ្ជាប់ប្រព័ន្ធ Roaming ឬអាចប្រើអ៊ិនធឺណិតបាន ។
តើគណនីរបស់ខ្ញុំអាចភ្ជាប់សេវាអេស៊ីលីដាយូនីធីជាមួយទូរស័ព្ទច្រើនគ្រឿងបានឬទេ ?
លោកអ្នកអាចភ្ជាប់ទូរស័ព្ទ ដើម្បីប្រើប្រាស់សេវាអេស៊ីលីដាយូនីធី បានច្រើនគ្រឿង ឱ្យតែទូរស័ព្ទទាំងអស់ជារបស់លោកអ្នកផ្ទាល់ ។
តើសមតុល្យទឹកប្រាក់ដែលបានបង្ហាញនៅក្នុងទូរស័ព្ទត្រឹមត្រូវដូចសមតុល្យដែលខ្ញុំមាននៅក្នុងគណនីដែរឬទេ ?
សមតុល្យទឹកប្រាក់ដែលបានបង្ហាញនៅក្នុងទូរស័ព្ទពិតជាត្រឹមត្រូវ ដូចសមតុល្យដែលលោកអ្នកមានជាក់ស្តែងក្នុងគណនីនៅធនាគារអេស៊ីលីដា នៅពេលធ្វើប្រតិបត្តិការនោះ ។
តើខ្ញុំត្រូវធ្វើដូចម្តេច ប្រសិនបើពេលកំពុងដំណើរការផ្ទេរប្រាក់ទៅគណនីអ្នកដទៃ ទូរស័ព្ទត្រូវរលត់ ?
ប្រសិនបើពេលកំពុងដំណើរការផ្ទេរប្រាក់ទៅគណនីអ្នកដទៃ ទូរស័ព្ទត្រូវរលត់លោកអ្នកត្រូវអនុវត្តដូចខាងក្រោម ៖
- បើកទូរស័ព្ទឡើងវិញ ហើយចូលក្នុងកម្មវិធីអេស៊ីលីដាយូនីធី រួចពិនិត្យមើលសមតុល្យគណនី តើមានការកាត់ប្រាក់ហើយឬនៅ (ប្រសិនបើទូរស័ព្ទអាចបើកបាន) ។
- ទាក់ទងមកការិយាល័យធនាគារអេស៊ីលីដា ដែលនៅជិតបំផុត ឬទាក់ទងមកការិយាល័យទំនាក់ទំនងអតិថិជន តាមរយៈទូរស័ព្ទលេខ ៖ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីឱ្យជួយពិនិត្យមើលសមតុល្យគណនី តើមានការកាត់ប្រាក់ហើយឬនៅ ។
- ទាក់ទងទៅអ្នកទទួលផល ឱ្យពិនិត្យមើលគណនីរបស់គាត់ តើមានទឹកប្រាក់ចូល ឬនៅ ។
- ប្រសិនបើធនាគារអេស៊ីលីដា បញ្ជាក់ថាគណនីរបស់លោកអ្នកត្រូវបានកាត់ ហើយគណនីអ្នកទទួលផលបានទទួល នោះមានន័យថា ប្រតិបត្តិការនោះបានជោគជ័យ ។
តើខ្ញុំត្រូវធ្វើដូចម្តេច នៅពេលខ្ញុំផ្ទេរប្រាក់លើសចំនួនដែលត្រូវផ្ទេរ ឬខុសគណនីអ្នកទទួលផល (គណនីគោលដៅ) ?
នៅពេលផ្ទេរប្រាក់លើសចំនួនដែលត្រូវផ្ទេរ ឬខុសគណនីអ្នកទទួលផល (គណនីគោលដៅ) លោកអ្នកត្រូវទាក់ទងទៅកាន់ការិយាល័យធនាគារអេស៊ីលីដា ដែលនៅជិតបំផុត ឬទាក់ទងមកការិយាល័យទំនាក់ទំនងអតិថិជនតាមរយៈទូរស័ព្ទលេខ ៖ ០២៣ ៩៩៤ ៤៤៤ ឬ ០១៥ ៩៩៩ ២៣៣ ជាបន្ទាន់ដើម្បីដោះស្រាយ ។
តើខ្ញុំត្រូវធ្វើដូចម្តេចនៅពេលដែលខ្ញុំផ្ទេរប្រាក់ខុសលេខទូរស័ព្ទអ្នកទទួល ?
នៅពេលដែលលោកអ្នកផ្ទេរប្រាក់ខុសលេខទូរស័ព្ទរបស់អ្នកទទួល នោះ ៖
- សូមលោកអ្នកកុំប្រាប់ Gold Code "លេខសម្ងាត់មាស" ទៅម្ចាស់លេខទូរស័ព្ទ នោះជាដាច់ខាត ព្រោះនៅក្នុងចន្លោះពី ៤៨ម៉ោង ទៅ ៧២ម៉ោង ទឹកប្រាក់នោះនឹងត្រូវបង្វែរចូលគណនីដើមវិញ ដោយស្វ័យប្រវត្តិ ។
- តែប្រសិនបើលោកអ្នកត្រូវការឱ្យទឹកប្រាក់នោះបង្វែរចូលគណនីរបស់លោកអ្នកវិញមុន ៧២ម៉ោង នោះលោកអ្នកត្រូវអញ្ជើញមកកាន់ការិយាល័យធនាគារអេស៊ីលីដា ។
តើខ្ញុំត្រូវធ្វើដូចម្តេច ដើម្បីផ្ទេរប្រាក់ទៅអ្នកទទួលផលដែលមិនមានគណនីជាមួយធនាគារអេស៊ីលីដា ?
បើសិនលោកអ្នកចង់ផ្ទេរប្រាក់ទៅអ្នកទទួលផលដែលមិនមានគណនីជាមួយធនាគារអេស៊ីលីដា នោះ ៖
- លោកអ្នកត្រូវស្គាល់លេខទូរស័ព្ទអ្នកទទួលប្រាក់ ។
- បន្ទាប់ពីផ្ទេរប្រាក់រួចរាល់ លោកអ្នកនឹងទទួលបានលេខសម្ងាត់មាស (Gold Code) ៦ខ្ទង់ ហើយត្រូវប្រាប់ទៅអ្នកទទួលប្រាក់ ដើម្បីដកប្រាក់នៅតាមម៉ាស៊ីនអេធីអឹម ឬនៅតាមបញ្ជរបេឡារបស់ធនាគារ អេស៊ីលីដា ។
តើខ្ញុំត្រូវវាយបញ្ចូលចំនួនទឹកប្រាក់យ៉ាងដូចម្តេច ដើម្បីឱ្យបានត្រឹមត្រូវ ?
នៅពេលធ្វើប្រតិបត្តិការទូទាត់ លោកអ្នកត្រូវវាយបញ្ចូលចំនួនទឹកប្រាក់ដែលត្រូវទូទាត់ ឱ្យបានត្រឹមត្រូវដូចខាងក្រោម ៖
- Application
  - ចំពោះទឹកប្រាក់ ១០០,៥០ដុល្លារអាមេរិក សូមវាយលេខ ៖ ១០០៥០
  - ចំពោះទឹកប្រាក់ ១០០,០០ដុល្លារអាមេរិក សូមវាយលេខ ៖ ១០០០០
- WAP (Web Browser)
  - ចំពោះទឹកប្រាក់ ១០០,៥០ដុល្លារអាមេរិក សូមវាយដូចក្នុងប្រអប់ (វាយលេខខ្ទង់ទសភាគដោយពុំចាំបាច់ប្រើកណ្តក់សញ្ញាទេ) ៖
    
    ១០០
    
    ៥០
    
    ផ្នែកគត់
    
    ផ្នែកទសភាគ
  - ចំពោះទឹកប្រាក់ ១០០,០០ដុល្លារអាមេរិក សូមវាយដូចក្នុងប្រអប់ (ពុំចាំបាច់វាយលេខខ្ទង់ទសភាគទេ) ៖
    
    ១០០
    
    ផ្នែកគត់
    
    ផ្នែកទសភាគ
តើខ្ញុំអាចផ្ទេរប្រាក់ពីគណនីរបស់ខ្ញុំ ទៅគណនីមិត្តភ័ក្តិខ្ញុំនៅក្នុងសាខាផ្សេងបានឬទេ ? បើបាន តើបានចំនួនប៉ុន្មានដែរ ?
លោកអ្នកអាចធ្វើការផ្ទេរប្រាក់ទៅមិត្តភ័ក្តិ ឬអាចទូទាត់ថ្លៃទំនិញឱ្យអ្នកលក់ ដែលមានគណនីនៅការិយាល័យធនាគារអេស៊ីលីដា ណាមួយក៏បាន ។ លោកអ្នកអាចផ្ទេរប្រាក់បានរហូតដល់ ២៥ដង ក្នុងមួយថ្ងៃ និងក្នុងមួយប្រតិបត្តិការបាន ៩៩៩ដុល្លារអាមេរិក ឬសមមូល (ចំពោះអតិថិជនពិសេស បាន ១០ដងក្នុងមួយថ្ងៃ និងក្នុងមួយប្រតិបត្តិការបាន ៥.០០០ដុល្លារអាមេរិក ឬសមមូល) ។
សំគាល់ ៖ ដើម្បីឱ្យងាយសម្រាប់ធ្វើប្រតិបត្តិការផ្ទេរប្រាក់លើកក្រោយ លោកអ្នកត្រូវរក្សាទុកឈ្មោះ និងលេខគណនី (រក្សាទុកជាកំណត់ត្រា) ដែលធ្លាប់បានធ្វើប្រតិបត្តិការលើកមុន ។ (សូមចុចទីនេះ ដើម្បីមើលបន្ថែមនៅក្នុងរបៀបប្រើប្រាស់សេវាអេស៊ីលីដាយូនីធី) ។
តើខ្ញុំអាចផ្ទេរប្រាក់ពីគណនីរបស់ខ្ញុំ ទៅទូរស័ព្ទមិត្តភ័កិ្តរបស់ខ្ញុំបានដែរ ឬទេ ? បើបាន តើអាចផ្ទេរបានប៉ុន្មានក្នុងមួយថ្ងៃ ?
- លោកអ្នកអាចផ្ទេរប្រាក់ពីគណនីរបស់លោកអ្នក ទៅទូរស័ព្ទ (ដែលភ្ជាប់ ឬមិនភ្ជាប់សេវាអេស៊ីលីដាយូនីធី) មិត្តភ័ក្តិរបស់លោកអ្នកបានដូចខាងក្រោម ៖
- លោកអ្នកអាចផ្ទេរប្រាក់ពីទូរស័ព្ទរបស់លោកអ្នកដែលបានភ្ជាប់សេវាអេស៊ីលីដាយូនីធី ទៅទូរស័ព្ទ ឬគណនីរបស់មិត្តភ័ក្តិលោកអ្នកបានដូចខាងក្រោម ៖
តើក្រុមហ៊ុនប្រព័ន្ធទូរស័ព្ទណាខ្លះ ដែលខ្ញុំអាចបញ្ចូលទឹកប្រាក់ក្នុងទូរស័ព្ទដៃបាន តាមរយៈសេវាអេស៊ីលីដាយូនីធី ?
សូមចុចទីនេះ សម្រាប់ព័ត៌មានលំអិតពីសេវាបញ្ចូលទឹកប្រាក់ក្នុងទូរស័ព្ទដៃ តាមរយៈសេវាអេស៊ីលីដាយូនីធី ។
តើមានអ្វីកើតឡើង ប្រសិនបើខ្ញុំបញ្ចូលលេខសម្ងាត់មិនត្រឹមត្រូវ ?
ប្រសិនបើលោកអ្នកបញ្ចូលលេខសម្ងាត់ខុសចំនួន ០៣ដង នោះប្រព័ន្ធនឹងបង្ខាំងសេវាអេស៊ីលីដាយូនីធីរបស់លោកអ្នកដោយស្វ័យប្រវត្តិ ។ ករណីនេះ លោកអ្នកត្រូវទាក់ទងមកការិយាល័យធនាគារអេស៊ីលីដា ដែលនៅជិតបំផុត ឬទាក់ទងការិយាល័យទំនាក់ទំនងអតិថិជន តាមរយៈទូរស័ព្ទលេខ ៖ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីឱ្យជួយដំណើរការសេវាឡើងវិញ ។
តើខ្ញុំត្រូវធ្វើដូចម្តេច ប្រសិនបើខ្ញុំភ្លេចលេខសម្ងាត់សេវាអេស៊ីលីដាយូនីធី ?
លោកអ្នកត្រូវអញ្ជើញមកការិយាល័យធនាគារអេស៊ីលីដាដែលនៅជិតបំផុត ដើម្បីសុំលេខសម្ងាត់ថ្មី ។
ប្រសិនបើទូរស័ព្ទដែលភ្ជាប់សេវាអេស៊ីលីដាយូនីធី បាត់ឬខូច តើខ្ញុំត្រូវធ្វើដូចម្តេច ?
សូមទាក់ទងមកការិយាល័យធនាគារអេស៊ីលីដាដែលនៅជិតលោកអ្នក ឬទាក់ទងមកការិយាល័យទំនាក់ទំនងអតិថិជន តាមរយៈទូរស័ព្ទលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ (ករណីបាត់ទូរស័ព្ទ) ដើម្បីបង្ខាំងសេវាអេស៊ីលីដាយូនីធី រួចហើយសុំឱ្យបញ្ចូលកម្មវិធីអេស៊ីលីដាយូនីធីក្នុងទូរស័ព្ទដែលបានទិញថ្មី ។
តើខ្ញុំត្រូវធ្វើដូចម្តេច ប្រសិនបើខ្ញុំលក់ ផ្ទេរ ឬឈប់ប្រើទូរស័ព្ទដែលបានភ្ជាប់សេវាអេស៊ីលីដាយូនីធី ឱ្យទៅអ្នកផ្សេង ?
លោកអ្នកត្រូវអញ្ជើញមកការិយាល័យធនាគារអេស៊ីលីដា ដែលជិតបំផុត ដើម្បីឱ្យជួយប្តូរមកប្រើប្រាស់សេវាអេស៊ីលីដាយូនីធីជាមួយទូរស័ព្ទថ្មីវិញ ។
តើខ្ញុំត្រូវធ្វើដូចម្តេច ប្រសិនបើទូរស័ព្ទខ្ញុំមិនអាចផ្ញើសារបាន ?
- បញ្ហានេះអាចបណ្តាលមកពីប្រព័ន្ធទូរស័ព្ទគ្មានសេវា សេវារអាក់រអួល ឬនៅក្រៅតំបន់សេវា ។
- លោកអ្នកត្រូវចូលមកក្នុងតំបន់ដែលទូរស័ព្ទមានសេវា ។
- សូមលោកអ្នកបិទទូរស័ព្ទហើយបើកមកវិញ ។
ខ្ញុំត្រូវធ្វើដូចម្តេច ប្រសិនបើទូរស័ព្ទខ្ញុំមិនអាចចូល Applicaiton ឬ WAP បាន ?
លោកអ្នកត្រូវពិនិត្យមើលក្នុងទូរស័ព្ទលោកអ្នក ថាតើអ៊ិនធឺណេតមានដំណើរការល្អឬទេ ឬទូរស័ព្ទខូច ឬត្រូវអញ្ជើញមកកាន់ការិយាល័យធនាគារអេស៊ីលីដា ដែលនៅជិតបំផុត ដើម្បីឱ្យជួយដោះស្រាយដោយធ្វើការទាញយកម្តងទៀត (Re-download, Re-WAP) ឬទាក់ទងមកការិយាល័យទំនាក់ទំនងអតិថិជន តាមរយៈទូរស័ព្ទលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ ។
ខ្ញុំត្រូវធ្វើដូចម្តេច ប្រសិនបើប្រព័ន្ធទាមទារឱ្យធ្វើការ Upgrade ?
លោកអ្នកត្រូវធ្វើការ Upgrade ដោយខ្លួនឯង តាមលំដាប់លំដោយដូចបានបង្ហាញក្នុងទូរស័ព្ទ ។ ប្រសិនបើមិនអាច Upgrade ដោយខ្លួនឯងបាន លោកអ្នកត្រូវមកកាន់ការិយាល័យធនាគារអេស៊ីលីដា ដែលនៅជិតបំផុត ដើម្បីឱ្យជួយ Upgrade ជូន ។
ប្រសិនបើទូរស័ព្ទខ្ញុំគ្មានទឹកប្រាក់ តើអាចធ្វើប្រតិបត្តិការបានដែរ ឬទេ ?
- តាម WAP (Web Browser) or Application
  លោកអ្នកអាចធ្វើប្រតិបត្តិការសេវាអេស៊ីលីដាយូនីធីបាន ឱ្យតែទូរស័ព្ទរបស់លោកអ្នកអាចប្រើអ៊ិនធឺណិតបាន ។
- តាម USSD
  លោកអ្នកអាចធ្វើប្រតិបត្តិការសេវាអេស៊ីលីដាយូនីធីបាន ទោះបីជាទូរស័ព្ទរបស់លោកអ្នកមិនមានទឹកប្រាក់គ្រប់គ្រាន់ ឬគ្មានអ៊ិនធឺណិតក៏ដោយ ។
តើលេខសម្ងាត់ (PIN) និង WAP Link អាចឱ្យអ្នកដទៃដឹងបានដែរឬទេ ?
លោកអ្នកត្រូវរក្សាលេខសម្ងាត់ (PIN) និងតំណភ្ជាប់ Web ជាការសម្ងាត់ផ្ទាល់ខ្លួនឱ្យបានត្រឹមត្រូវ និងមានសុវត្ថិភាពខ្ពស់បំផុត ។
ប្រសិនបើខ្ញុំមានគណនីចំនួនពីរ នៅសាខារបស់ធនាគារអេស៊ីលីដាផ្សេងគ្នា តើខ្ញុំអាចភ្ជាប់គណនីទាំងពីរជាមួយទូរស័ព្ទរបស់ខ្ញុំបានដែរ ឬទេ ?
លោកអ្នកអាចភ្ជាប់គណនីទាំងពីរនេះជាមួយទូរស័ព្ទរបស់លោកអ្នកបាន ។

ម៉ាស៊ីនឆូតកាត អេស៊ីលីដា

តើម៉ាស៊ីនឆូតកាត អេស៊ីលីដា ជាអ្វី ?
ម៉ាស៊ីនឆូតកាតអេស៊ីលីដា ជាឧបករណ៍អេឡិចត្រូនិកដែលប្រើជាមួយ ប័ណ្ណអេស៊ីលីដា ប័ណ្ណមាសអេស៊ីលីដា ប័ណ្ណឥណពន្ធវីសាអេស៊ីលីដា និងប័ណ្ណវីសារបស់ធនាគារផ្សេង សម្រាប់ទូទាត់ទំនិញ ឬសេវាកម្មផ្សេងៗ ដែលមានលក្ខណៈងាយស្រួល និងសុវត្ថិភាពខ្ពស់បំផុត ។ ពិសេសជាងនេះទៅទៀត លោកអ្នកអាចស្នើសុំដកសាច់ប្រាក់នៅកន្លែងអ្នកលក់បាន ប្រសិនបើមានការព្រមព្រៀងពីម្ចាស់ហាង ។
តើខ្ញុំអាចដកប្រាក់តាមម៉ាស៊ីនឆូតកាតអេស៊ីលីដា បានប៉ុន្មានក្នុងមួយថ្ងៃ ?
លោកអ្នកអាចប្រើប្រាស់ប័ណ្ណអេស៊ីលីដា ប័ណ្ណមាសអេស៊ីលីដា ឬប័ណ្ណឥណពន្ធវីសាអេស៊ីលីដា ដកប្រាក់បានចំនួន ២០០ដុល្លារអាមេរិក ក្នុងមួយថ្ងៃ (ប្រសិនបើមានការព្រមព្រៀងពីម្ចាស់ហាង) ។
តើប្រភេទប័ណ្ណណាខ្លះ ដែលអាចធ្វើប្រតិបត្តិការជាមួយម៉ាស៊ីនឆូតកាតអេស៊ីលីដាបាន ?
ម៉ាស៊ីនឆូតកាត អេស៊ីលីដា អាចធ្វើប្រតិបត្តិការបានជាមួយនឹងប័ណ្ណអេស៊ីលីដាគ្រប់ប្រភេទ ប័ណ្ណឥណពន្ធវីសាអេស៊ីលីដា និងប័ណ្ណវីសារបស់ធនាគារផ្សេង ។
ប្រសិនបើខ្ញុំធ្វើប្រតិបត្តិការទូទាត់ថ្លៃទំនិញជាមួយម៉ាស៊ីនឆូតកាតអេស៊ីលីដា តើត្រូវគិតថ្លៃសេវាដែរឬទេ ?
លោកអ្នកអាចធ្វើប្រតិបត្តិការនេះបាន ដោយពុំមានគិតថ្លៃសេវាឡើយ ។
តើប័ណ្ណអេស៊ីលីដា ឬប័ណ្ណឥណពន្ធវីសាអេស៊ីលីដាគ្រប់ប្រភេទ អាចធ្វើប្រតិបត្តិការទូទាត់ទំនិញតាមម៉ាស៊ីនឆូតកាតអេស៊ីលីដាបានប៉ុន្មានប្រតិបត្តិការក្នុងមួយថ្ងៃ ?
ប័ណ្ណអេស៊ីលីដា ឬប័ណ្ណឥណពន្ធវីសាអេស៊ីលីដាគ្រប់ប្រភេទ អាចធ្វើប្រតិបត្តិការទូទាត់ទំនិញតាមម៉ាស៊ីនឆូតកាត អេស៊ីលីដា បានប្រាំដងក្នុងមួយថ្ងៃ (រួមទាំងប្រតិបត្តិការតាមម៉ាស៊ីនអេធីអឹម និងអ៊ីនធើណែតផងដែរ) ។
តើប័ណ្ណអេស៊ីលីដា ឬប័ណ្ណឥណពន្ធវីសាអេស៊ីលីដាគ្រប់ប្រភេទ អាចធ្វើប្រតិបត្តិការទូទាត់ទំនិញបានចំនួនទឹកប្រាក់ប៉ុន្មានក្នុងមួយថ្ងៃ ?
ប័ណ្ណអេស៊ីលីដា ឬប័ណ្ណឥណពន្ធវីសាអេស៊ីលីដាគ្រប់ប្រភេទ អាចធ្វើប្រតិបត្តិការទូទាត់ទំនិញបានជាមួយនឹងម៉ាស៊ីនឆូតកាតអេស៊ីលីដា ដូចខាងក្រោម ៖
- ប័ណ្ណអេស៊ីលីដា ៖ រហូតដល់ ៣.០០០ដុល្លារអាមេរិក ក្នុងមួយថ្ងៃ
- ប័ណ្ណមាសអេស៊ីលីដា ៖ រហូតដល់ ៥.០០០ដុល្លារអាមេរិក ក្នុងមួយថ្ងៃ
- ប័ណ្ណឥណពន្ធវីសាអេស៊ីលីដាក្នុងស្រុក ៖ រហូតដល់ ២.០០០ដុល្លារអាមេរិក ក្នុងមួយថ្ងៃ
- ប័ណ្ណឥណពន្ធវីសាអេស៊ីលីដាក្រៅប្រទេស ៖ រហូតដល់ ៤.០០០ដុល្លារអាមេរិក ក្នុងមួយថ្ងៃ
តើប័ណ្ណអេស៊ីលីដា ឬប័ណ្ណឥណពន្ធវីសាអេស៊ីលីដាគ្រប់ប្រភេទ អាចធ្វើប្រតិបត្តិការទូទាត់ទំនិញ ជារូបិយប័ណ្ណប្រភេទណាខ្លះ ?
ការទូទាត់ទំនិញបានតែជាប្រភេទប្រាក់ដុល្លារតែប៉ុណ្ណោះ តែគណនីដែលភ្ជាប់ប័ណ្ណ (ប័ណ្ណអេស៊ីលីដា ឬប័ណ្ណមាសអេស៊ីលីដា) អាចជាប្រភេទរូបិយប័ណ្ណផ្សេងបាន ដូច្នេះប្រតិបត្តិការទូទាត់នឹងត្រូវគិតទៅតាមអត្រាប្តូរប្រាក់របស់ធនាគារអេស៊ីលីដា ។

សេវាប័ណ្ណឥណពន្ធវីសាអេស៊ីលីដា

តើប័ណ្ណឥណពន្ធវីសាអេស៊ីលីដា ជាអ្វី ?
ប័ណ្ណឥណពន្ធវីសាអេស៊ីលីដា គឺជាប័ណ្ណប្លាស្ទិកអេឡិចត្រូនិក មានបទដ្ឋាន EMV (Europay, Master និង VISA) / Memory Chip ដែលបង្កើតឡើងប្រកបដោយសុវត្ថិភាពខ្ពស់មិនអាចក្លែងបន្លំបាន ដោយមានការទទួលស្គាល់ជាផ្លូវការពីស្ថាប័ន VISA និងប្រើប្រាស់ប្រព័ន្ធនិងស្លាកសញ្ញា VISA ដែលធនាគារចេញប័ណ្ណជូនអតិថិជន សម្រាប់ធ្វើប្រតិបត្តិការដកសាច់ប្រាក់នៅតាមម៉ាស៊ីនអេធីអឹម និងទូទាត់ចំណាយផ្សេងៗតាមម៉ាស៊ីនឆូតកាត ដែលមានបិទស្លាកសញ្ញា VISA ឬ VISA Plus នៅទូទាំងប្រទេស និងពាសពេញពិភពលោក ។
តើធ្វើដូចម្តេចដើម្បីស្នើសុំ ប័ណ្ណឥណពន្ធវីសាអេស៊ីលីដា ?
- លោកអ្នកគ្រាន់តែបើកគណនីមួយនៅធនាគារអេស៊ីលីដា អាចជាគណនីបញ្ញើសំចៃ គណនីតាមតម្រូវការ ឬគណនីចរន្ត
- ត្រូវមានសមតុល្យក្នុងគណនីអប្បបរមា ៥០ដុល្លារអាមេរិក សម្រាប់អតិថិជនឯកត្តជន និង ១០០ដុល្លារអាមេរិក សម្រាប់អតិថិជនក្រុមហ៊ុន សម្រាប់ប័ណ្ណឥណពន្ធវីសាអេស៊ីលីដាក្នុងស្រុក និងក្រៅប្រទេស ។
បន្ទាប់ពីដាក់ពាក្យស្នើសុំប័ណ្ណឥណពន្ធវីសាអេស៊ីលីដា តើរយៈពេលប៉ុន្មានថ្ងៃ ទើបទទួលបានប័ណ្ណ ?
បន្ទាប់ពីដាក់ពាក្យស្នើសុំ រយៈពេល១០ថ្ងៃ ទើបលោកអ្នកអាចទទួលបានប័ណ្ណឥណពន្ធវីសាអេស៊ីលីដា ។
តើការស្នើសុំប័ណ្ណឥណពន្ធវីសាអេស៊ីលីដា គិតថ្លៃសេវា និងសេវាប្រចាំខែដូចម្តេចដែរ ?
ធនាគារ អេស៊ីលីដាមិនគិតថ្លៃសេវាទេ សម្រាប់ការស្នើសុំប័ណ្ណឥណពន្ធវីសាអេស៊ីលីដាថ្មី និងគិតថ្លៃសេវាប្រចាំខែ ដូចខាងក្រោម ៖
- ០,២០ដុល្លារអាមេរិក សម្រាប់ប័ណ្ណឥណពន្ធវីសាអេស៊ីលីដាក្នុងប្រទេស
- ០,៩០ដុល្លារអាមេរិក សម្រាប់ប័ណ្ណឥណពន្ធវីសាអេស៊ីលីដាក្រៅប្រទេស
តើក្នុងមួយថ្ងៃ អាចទូទាត់ថ្លៃទំនិញ និងដកប្រាក់បានប៉ុន្មាន ហើយចំនួនប៉ុន្មានដង ?
- លោកអ្នក អាចដកប្រាក់បានរហូតដល់ ១.០០០ដុល្លារអាមេរិកក្នុងមួយថ្ងៃ តាមរយៈម៉ាស៊ីនអេធីអឹម និង២០០ដុល្លារអាមេរិកក្នុងមួយថ្ងៃ តាមម៉ាស៊ីនឆូតកាត ឬសមមូលទៅនឹងប្រាក់ផ្សេង
- ទូទាត់ចំណាយផ្សេងៗ តាមរយៈម៉ាស៊ីនឆូតកាតក្នុងមួយថ្ងៃ រហូតដល់ ៤.០០០ដុល្លារអាមេរិក សម្រាប់ប័ណ្ណឥណពន្ធវីសាអេស៊ីលីដាក្រៅប្រទេស និងទូទាត់ចំណាយផ្សេងៗតាម Internet រហូតដល់ ២.០០០ដុល្លារអាមេរិក ក្នុងមួយថ្ងៃ
- លោកអ្នកអាចធ្វើប្រតិបត្តិការរហូតដល់ ៥ប្រតិបត្តិការក្នុងមួយថ្ងៃ ទាំងម៉ាស៊ីនអេធីអឹម និងម៉ាស៊ីនឆូតកាត
តើត្រូវធ្វើដូចម្តេចប្រសិនបើបាត់ ឬខូចប័ណ្ណឥណពន្ធវីសាអេស៊ីលីដា ?
បើលោកអ្នកបាត់ ឬខូចប័ណ្ណឥណពន្ធវីសាអេស៊ីលីដា ដំបូងសូមលោកអ្នកទូរស័ព្ទមកលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីសុំបង្ខាំងប័ណ្ណជាមុនសិន បន្ទាប់មកសូមលោកអ្នកអញ្ជើញមកកាន់ការិយាល័យធនាគារអេស៊ីលីដា ដែលនៅជិតបំផុត ដើម្បីបំពេញពាក្យសុំបង្ខាំង និងស្នើសុំប័ណ្ណថ្មី ។
តើធនាគារគិតថ្លៃសេវាប៉ុន្មាន ចំពោះការស្នើសុំប័ណ្ណឥណពន្ធវីសាអេស៊ីលីដាថ្មីជំនួសប័ណ្ណចាស់ដែលខូច ឬបាត់ ?
ធនាគារអេស៊ីលីដា គិតថ្លៃសេវា ៧ដុល្លារអាមេរិក ចំពោះការស្នើសុំប័ណ្ណថ្មីជំនួសប័ណ្ណចាស់ដែលខូច និង ១៥ដុល្លារអាមេរិក ចំពោះការស្នើសុំប័ណ្ណថ្មីជំនួសប័ណ្ណចាស់ដែលបាត់ ។
ប្រសិនបើមានប័ណ្ណអេស៊ីលីដារួចហើយ តើអាចស្នើសុំប័ណ្ណឥណពន្ធវីសាអេស៊ីលីដា បានឬទេ ?
ករណីលោកអ្នកមានប័ណ្ណអេស៊ីលីដារួចហើយ លោកអ្នកក៏អាចស្នើសុំប័ណ្ណឥណពន្ធវីសាអេស៊ីលីដាមួយទៀតបានដែរ ។
តើការទូទាត់ចំណាយផ្សេងៗ និងការដកប្រាក់ដោយប្រើប័ណ្ណឥណពន្ធវីសាអេស៊ីលីដា គិតថ្លៃសេវាដូចម្តេច ?
ប័ណ្ណឥណពន្ធវីសាអេស៊ីលីដា អាចធ្វើការដកប្រាក់និងទូទាត់ចំណាយផ្សេងៗនៅតាមហាងទំនិញ សណ្ឋាគារ ឬក្រុមហ៊ុននានា ដោយគិតថ្លៃសេវាដូចខាងក្រោម ៖
- សម្រាប់ការទូទាត់
- សម្រាប់ការដកប្រាក់
តើគណនីមួយអាចស្នើសុំប័ណ្ណឥណពន្ធវីសាអេស៊ីលីដា បានប៉ុន្មាន ?
គណនីមួយអាចស្នើសុំប័ណ្ណឥណពន្ធវីសាអេស៊ីលីដា បានតែមួយប៉ុណ្ណោះ ។
ប្រសិនបើខ្ញុំមានប័ណ្ណឥណពន្ធវីសាអេស៊ីលីដាក្នុងស្រុករួចហើយ តើខ្ញុំអាចប្តូរទៅជាប័ណ្ណឥណពន្ធវីសា អេស៊ីលីដាក្រៅប្រទេសបាន ដែរឬទេ ?
លោកអ្នកអាចប្តូរបានដោយមិនគិតថ្លៃសេវា ។ ប៉ុន្តែបើលោកអ្នកសុំប្តូរមុនរយៈពេល ៦ខែ ត្រូវគិតថ្លៃសេវា ៥ដុល្លារអាមេរិក ។
តើប័ណ្ណឥណពន្ធវីសាអេស៊ីលីដាប្រើបានរយៈពេលប៉ុន្មាន ?
សម្រាប់ប័ណ្ណឥណពន្ធវីសាអេស៊ីលីដាមួយ មានរយៈពេលប្រើប្រាស់ រហូតដល់២ឆ្នាំ ទើបផុតកំណត់ ។

ប័ណ្ណឥណពន្ធវីសាអេស៊ីលីដាពិសេស

តើប័ណ្ណឥណពន្ធវីសាអេស៊ីលីដាពិសេសជាអ្វី ?
ប័ណ្ណឥណពន្ធវីសាអេស៊ីលីដាពិសេស គឺជាប័ណ្ណវីសាមួយប្រភេទ ដែលចេញដោយធនាគារអេស៊ីលីដា ហើយមានលទ្ធភាពដកប្រាក់ ឬទូទាត់ចំណាយផ្សេងៗ បានច្រើនជាងប័ណ្ណឥណពន្ធវីសាអេស៊ីលីដាធម្មតា ។
តើធ្វើដូចម្តេចដើម្បីស្នើសុំប័ណ្ណឥណពន្ធវីសាអេស៊ីលីដាពិសេសបាន ?
លោកអ្នកត្រូវមាន ៖
- គណនីជាមួយធនាគារអេស៊ីលីដា ។
- មុខរបរច្បាស់លាស់ ត្រឹមត្រូវ ឬស្ថានភាពអាជីវកម្មស័ក្តិសមនឹងការស្នើសុំប្រើប្រាស់ប័ណ្ណប្រភេទនេះ ។
- សមតុល្យគណនី និងលទ្ធភាពគ្រប់គ្រាន់ក្នុងការប្រើប្រាស់ប័ណ្ណនេះ ។
បន្ទាប់ពីដាក់ពាក្យស្នើសុំប័ណ្ណឥណពន្ធវីសាអេស៊ីលីដាពិសេស តើរយៈពេលប៉ុន្មានថ្ងៃទើបទទួលបានប័ណ្ណនេះ ?
បន្ទាប់ពីដាក់ពាក្យស្នើសុំ រយៈពេលមិនលើសពីដប់ថ្ងៃ លោកអ្នកអាចទទួលបានប័ណ្ណឥណពន្ធវីសាពិសេសនេះ ។
តើការស្នើសុំប័ណ្ណឥណពន្ធវីសាអេស៊ីលីដាពិសេសដំបូង គិតថ្លៃសេវាដែរឬទេ ?
ការស្នើសុំប័ណ្ណដំបូងមិនគិតថ្លៃសេវាឡើយ ។
តើត្រូវធ្វើដូចម្តេច ប្រសិនបើបាត់ ឬខូចប័ណ្ណឥណពន្ធវីសាអេស៊ីលីដាពិសេស ?
ប្រសិនបើលោកអ្នកបាត់ ឬខូចប័ណ្ណ ដំបូងសូមលោកអ្នកទូរស័ព្ទមកលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីស្នើសុំបង្ខាំងប័ណ្ណជាមុនសិន ។ បន្ទាប់មកសូមលោកអ្នកអញ្ជើញមកកាន់ការិយាល័យធនាគារអេស៊ីលីដា ដែលនៅជិតបំផុត ដើម្បីបំពេញពាក្យស្នើសុំបង្ខាំង និងស្នើសុំប័ណ្ណថ្មី ។
ប្រសិនបើខ្ញុំមានប័ណ្ណអេស៊ីលីដារួចហើយ តើខ្ញុំអាចស្នើសុំប័ណ្ណឥណពន្ធវីសាពិសេសទៀតបានដែរឬទេ ?
ប្រសិនបើលោកអ្នកមានប័ណ្ណអេស៊ីលីដារួចហើយ លោកអ្នកក៏អាចស្នើសុំប័ណ្ណឥណពន្ធវីសាពិសេសមួយទៀតបានដែរ ។
តើគណនីមួយអាចស្នើសុំប័ណ្ណឥណពន្ធវីសាអេស៊ីលីដាពិសេសបានប៉ុន្មាន ?
គណនីមួយអនុញ្ញាតឱ្យស្នើសុំប័ណ្ណនេះបានតែមួយប៉ុណ្ណោះ ។
តើប័ណ្ណឥណពន្ធវីសាអេស៊ីលីដាពិសេសអាចធ្វើប្រតិបត្តិការអ្វីខ្លះ ជាមួយម៉ាស៊ីនអេធីអឹម និងម៉ាស៊ីនឆូតកាតរបស់ធនាគារផ្សេង ?
- អាចដកប្រាក់ និងមើលសមតុល្យជាមួយម៉ាស៊ីនអេធីអឹមរបស់ធនាគារផ្សេងដែលមានស្លាកសញ្ញា VISA ។
- អាចទូទាត់ទំនិញ និងដកប្រាក់បានជាមួយនឹងម៉ាស៊ីនឆូតកាតរបស់ធនាគារផ្សេង ។
តើប័ណ្ណឥណពន្ធវីសាអេស៊ីលីដាពិសេស អាចប្រើបានរយៈពេលប៉ុន្មាន ?
សម្រាប់ប័ណ្ណមួយអាចប្រើប្រាស់រយៈពេល ២ឆ្នាំទើបផុតកំណត់ ។ ការផ្លាស់ប្តូរប័ណ្ណដែលផុតកំណត់ នឹងមិនតម្រូវឱ្យបង់ថ្លៃសេវាបន្ថែមទៀតទេ ។
តើធនាគារគិតថ្លៃសេវាដែរឬទេ នៅពេលដែលយកប័ណ្ណឥណពន្ធវីសាអេស៊ីលីដាពិសេស ទៅប្រើប្រាស់ជាមួយម៉ាស៊ីនឆូតកាតរបស់ធនាគារផ្សេងនៅក្រៅប្រទេស ?
ការធ្វើប្រតិបត្តិការទំនិញតាមរយៈម៉ាស៊ីនឆូតកាតរបស់ធនាគារផ្សេងនៅក្រៅប្រទេស គឺមិនគិតថ្លៃសេវាទេ ។
តើក្នុងមួយថ្ងៃប័ណ្ណមួយអាចទូទាត់ទំនិញ និងដកប្រាក់បានប៉ុន្មាន ហើយចំនួនប៉ុន្មានដង ?
- លោកអ្នកអាចដកប្រាក់បានរហូតដល់ ១០.០០០ដុល្លារ ឬ ២.០០០.០០០រៀល ក្នុងមួយថ្ងៃតាមម៉ាស៊ីនអេធីអឹម និងអាចធ្វើប្រតិបត្តិការបាន ៥ដង ក្នុងមួយថ្ងៃដោយបូករួមទាំងប្រតិបត្តិការតាមម៉ាស៊ីនឆូតកាត ។
- លោកអ្នកអាចទូទាត់ចំណាយផ្សេងៗតាមរយៈម៉ាស៊ីនឆូតកាត បានរហូតដល់ ២០.០០០ដុល្លារ និងតាមរយៈ Internet បានរហូតដល់ ១០.០០០ដុល្លារ ។

សេវាប័ណ្ណអេស៊ីលីដា

តើប័ណ្ណអេស៊ីលីដាគឺជាអ្វី ?
ប័ណ្ណអេស៊ីលីដា គឺជាប័ណ្ណចេញដោយធនាគារអេស៊ីលីដា ជូនដល់អតិថិជនដើម្បីធ្វើប្រតិបត្តិការដកប្រាក់តាមម៉ាស៊ីនដកប្រាក់ដោយស្វ័យប្រវត្តិ ទូទាត់ថ្លៃទំនិញឬថ្លៃសេវាកម្មផ្សេងៗ នៅតាមហាងទំនិញ សណ្ឋាគារ ឬក្រុមហ៊ុននានា ដែលមានម៉ាស៊ីនឆូតកាត និងធ្វើប្រតិបត្តិការផ្សេងៗទៀតតាមរយៈប្រព័ន្ធ Electronic Terminal ដទៃទៀត ។ ប័ណ្ណអេស៊ីលីដា ផ្តល់លទ្ធភាពឱ្យអតិថិជនធ្វើប្រតិបត្តិការ ២៤ម៉ោងក្នុងមួយថ្ងៃ និង៧ថ្ងៃក្នុងមួយសប្តាហ៍ ប្រកបដោយភាពងាយស្រួល ឆាប់រហ័ស និងសុវត្ថិភាពខ្ពស់បំផុត ។
ដើម្បីទទួលបានប័ណ្ណអេស៊ីលីដា តើត្រូវធ្វើដូចម្តេច ?
ដើម្បីទទួលបានប័ណ្ណអេស៊ីលីដា លោកអ្នកគ្រាន់តែបើកគណនីមួយនៅធនាគារ អេស៊ីលីដា ដែលគណនីនោះអាចជាគណនីបញ្ញើសំចៃ គណនីតាមតម្រូវការ ឬគណនីចរន្ត បន្ទាប់មកលោកអ្នកអាចបំពេញពាក្យដើម្បីស្នើសុំប័ណ្ណអេស៊ីលីដា ។
បន្ទាប់ពីដាក់ពាក្យសុំប្រើប្រាស់ប័ណ្ណអេស៊ីលីដា តើរយៈពេលប៉ុន្មានថ្ងៃទើបទទួលបានប័ណ្ណ ?
បន្ទាប់ពីដាក់ពាក្យសុំប្រើប្រាស់ប័ណ្ណអេស៊ីលីដា រយៈពេល១០ថ្ងៃ ទើបទទួលបានប័ណ្ណ ។
តើធនាគារអេស៊ីលីដា គិតកម្រៃសេវាដូចម្តេចដែរលើការប្រើប្រាស់ប័ណ្ណអេស៊ីលីដានេះ ?
ធនាគារអេស៊ីលីដា មិនគិតកម្រៃសេវាក្នុងការប្រើប្រាស់ប័ណ្ណទេ និងគិតកម្រៃ ០,៦០ដុល្លារអាមេរិក សម្រាប់ថ្លៃសេវាប្រចាំត្រីមាស ។
តើក្នុងមួយថ្ងៃ ប័ណ្ណអេស៊ីលីដាអាចដកប្រាក់ និងទូទាត់ថ្លៃទំនិញបានប៉ុន្មាន ? ហើយចំនួនប៉ុន្មានដង ?
- លោកអ្នកអាចដកប្រាក់ក្នុង១ថ្ងៃបានរហូតដល់ ១.០០០ដុល្លារអាមេរិក តាមរយៈម៉ាស៊ីនអេធីអឹម និង ២០០ដុល្លារអាមេរិក តាមរយៈម៉ាស៊ីនឆូតកាត
- អាចទូទាត់ចំណាយផ្សេងៗ តាមរយៈម៉ាស៊ីនឆូតកាត បានរហូតដល់ ៣.០០០ដុល្លារអាមេរិក ក្នុង១ថ្ងៃ
- អាចធ្វើប្រតិបត្តិការបាន ៥ដងក្នុង១ថ្ងៃ សម្រាប់ប័ណ្ណមួយ គិតទាំងម៉ាស៊ីនអេធីអឹម និងម៉ាស៊ីនឆូតកាត
តើខ្ញុំអាចដកប្រាក់ឆ្លងសាខាខេត្ត-រាជធានីផ្សេងៗគ្នា តាមរយៈប័ណ្ណអេស៊ីលីដាបានឬទេ ? ហើយគិតកម្រៃសេវាប៉ុន្មាន ?
លោកអ្នកអាចដកប្រាក់ឆ្លងសាខាខេត្ត-រាជធានីផ្សេងៗគ្នាបាន តាមរយៈប័ណ្ណអេស៊ីលីដានេះ ហើយធនាគារអេស៊ីលីដាមិនគិតថ្លៃសេវាក្នុងការដកប្រាក់ឡើយ ។
តើខ្ញុំអាចដាក់ពាក្យស្នើសុំប្រើប្រាស់ប័ណ្ណអេស៊ីលីដានៅទីណា ?
លោកអ្នកអាចដាក់ពាក្យដើម្បីប្រើប្រាស់ប័ណ្ណអេស៊ីលីដាជាមួយ ធនាគារអេស៊ីលីដា ណាមួយដែលនៅជិតលោកអ្នកបំផុត ។
ប្រសិនបើខ្ញុំបាត់ប័ណ្ណអេស៊ីលីដា តើខ្ញុំត្រូវធ្វើដូចម្តេច ?
ប្រសិនបើលោកអ្នកបាត់ប័ណ្ណអេស៊ីលីដា សូមលោកអ្នកទូរស័ព្ទមកលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីបង្ខាំងប័ណ្ណជាមុនសិន បន្ទាប់មកសូមលោកអ្នកអញ្ជើញមកបំពេញពាក្យដើម្បីបង្ខាំង និងបំពេញពាក្យសុំប័ណ្ណថ្មីជំនួសប័ណ្ណអេស៊ីលីដាដែលបានបាត់ ។
តើធនាគារអេស៊ីលីដា គិតកម្រៃសេវាប៉ុន្មានចំពោះការចេញប័ណ្ណអេស៊ីលីដាថ្មីជំនួសប័ណ្ណដែលបាត់ ?
ធនាគារអេស៊ីលីដា គិតកម្រៃសេវា៣ដុល្លារអាមេរិក សម្រាប់ការចេញប័ណ្ណអេស៊ីលីដាថ្មីជំនួសប័ណ្ណដែលបាត់ ។
ដើម្បីប្រើប្រាស់ប័ណ្ណអេស៊ីលីដាបាន តើខ្ញុំត្រូវធ្វើដូចម្តេច ?
ដើម្បីប្រើប្រាស់ប័ណ្ណអេស៊ីលីដាបាន លោកអ្នកត្រូវមាន ៖
- ប័ណ្ណអេស៊ីលីដា
- លេខសម្ងាត់៦ខ្ទង់ដែលបេឡាធិការប្រគល់ជូន
- ដឹងពីនីតិវិធីប្រើប្រាស់ប័ណ្ណ ដែលភ្នាក់ងារបម្រើអតិថិជនបានពន្យល់យ៉ាងក្បោះក្បាយនៅពេលប្រគល់ជូនដំបូង
- ទីតាំងធនាគារអេស៊ីលីដា ដែលបានបំពាក់ម៉ាស៊ីនអេធីអឹម
- ហាង ផ្សារ សណ្ឋាគារ និងកន្លែងផ្សេងៗដែលមានម៉ាស៊ីនឆូតកាតអេស៊ីលីដា ។
តើប័ណ្ណមាសអេស៊ីលីដា និងប័ណ្ណអេស៊ីលីដាខុសគ្នាដូចម្តេច ?
ប័ណ្ណមាសអេស៊ីលីដា ខុសពីប័ណ្ណអេស៊ីលីដាធម្មតាត្រង់ថា ប័ណ្ណមាសអេស៊ីលីដាអាចដកប្រាក់ និងទូទាត់ចំណាយផ្សេងៗតាមរយៈម៉ាស៊ីនឆូតកាតបានច្រើនជាងប័ណ្ណអេស៊ីលីដា ធម្មតា ហើយត្រូវបានគិតថ្លៃសេវាប្រចាំខែ និងថ្លៃសេវាក្នុងការដកប្រាក់ពីម៉ាស៊ីនអេធីអឹម ឬម៉ាស៊ីនឆូតកាត ។
ដើម្បីទទួលប័ណ្ណមាសអេស៊ីលីដាបាន តើត្រូវធ្វើដូចម្តេច ?
ដើម្បីទទួលប័ណ្ណមាសអេស៊ីលីដាបាន លោកអ្នកគ្រាន់តែបើកគណនីមួយនៅធនាគារ អេស៊ីលីដា ដែលគណនីនោះអាចជាគណនីបញ្ញើសំចៃ គណនីតាមតម្រូវការ ឬគណនីចរន្ត បន្ទាប់មកគាត់អាចបំពេញពាក្យដើម្បីស្នើសុំប្រើប្រាស់ប័ណ្ណមាសអេស៊ីលីដា ។
ដើម្បីស្នើសុំប្រើប្រាស់ប័ណ្ណមាសអេស៊ីលីដាបាន តើយើងត្រូវមានសមតុល្យអប្បបរមាប៉ុន្មាននៅក្នុងគណនី ?
ត្រូវមានសមតុល្យអប្បបរមា ៥០ដុល្លារអាមេរិក សម្រាប់គណនីឯកត្តជន និង ១០០ដុល្លារអាមេរិក សម្រាប់គណនីក្រុមហ៊ុន
បន្ទាប់ពីដាក់ពាក្យសុំប្រើប្រាស់ប័ណ្ណមាសអេស៊ីលីដា តើរយៈពេលប៉ុន្មានថ្ងៃទើបទទួលបានប័ណ្ណ ?
បន្ទាប់ពីដាក់ពាក្យសុំប្រើប្រាស់ប័ណ្ណមាសអេស៊ីលីដា រយៈពេល ១០ថ្ងៃ ទើបទទួលបានប័ណ្ណ ។
តើធនាគារអេស៊ីលីដា គិតកម្រៃសេវាប្រចាំខៃប៉ុន្មាន ចំពោះការប្រើប្រាស់ប័ណ្ណមាសអេស៊ីលីដា ?
គិតថ្លៃសេវា ០,៥០ដុល្លារអាមេរិកក្នុងមួយខែ សម្រាប់ប័ណ្ណមាសអេស៊ីលីដាមួយ ។
តើក្នុងមួយថ្ងៃ ប័ណ្ណមាសអេស៊ីលីដាមួយ អាចដកប្រាក់និងទូទាត់ថ្លៃទំនិញបានប៉ុន្មាន ហើយចំនួនប៉ុន្មានដង ?
- លោកអ្នក អាចដកប្រាក់បានក្នុងមួយថ្ងៃរហូតដល់ ៣.០០០ដុល្លារអាមេរិក ឬសមមូលនឹងប្រាក់ផ្សេង តាមម៉ាស៊ីនអេធីអឹម និង ២០០ដុល្លារអាមេរិក ឬសមមូលនឹងប្រាក់ផ្សេង តាមម៉ាស៊ីនឆូតកាត
- ទូទាត់ចំណាយផ្សេងៗតាមរយៈម៉ាស៊ីនឆូតកាតបានរហូតដល់ ៥.០០០ដុល្លារអាមេរិក ឬសមមូលនឹងប្រាក់ផ្សេងក្នុងមួយថ្ងៃ សម្រាប់ប័ណ្ណមួយ
- ធ្វើប្រតិបត្តិការបាន ៥ដងក្នុងមួយថ្ងៃ គិតទាំងម៉ាស៊ីនអេធីអឹម និងម៉ាស៊ីនឆូតកាត
តើខ្ញុំអាចដកប្រាក់ឆ្លងសាខាខេត្ត-រាជធានីផ្សេងៗគ្នា តាមរយៈប័ណ្ណមាសអេស៊ីលីដាបានឬទេ ? ហើយគិតកម្រៃសេវាប៉ុន្មាន ?
លោកអ្នកអាចដកប្រាក់បាន តាមម៉ាស៊ីនអេធីអឹមរបស់ធនាគារអេស៊ីលីដា គ្រប់សាខាខេត្ត-រាជធានី ។ សូមចុចទីនេះ សម្រាប់តារាងតម្លៃរបស់ប័ណ្ណមាសអេស៊ីលីដា ។
តើខ្ញុំអាចដាក់ពាក្យប្រើប្រាស់ប័ណ្ណមាសអេស៊ីលីដានៅទីណា ?
លោកអ្នកអាចដាក់ពាក្យសុំប្រើប្រាស់ប័ណ្ណមាសអេស៊ីលីដា ជាមួយសាខារបស់ធនាគារអេស៊ីលីដាណាមួយដែលនៅជិតលោកអ្នកបំផុត ។
ប្រសិនបើបាត់ប័ណ្ណមាសអេស៊ីលីដា តើខ្ញុំត្រូវធ្វើដូចម្តេច ?
ប្រសិនបើលោកអ្នកបាត់ប័ណ្ណមាសអេស៊ីលីដា សូមទូរស័ព្ទមកលេខ ០២៣ ៩៩៤ ៤៤៤ ឬ ០១៥ ៩៩៩ ២៣៣ ដើម្បីសុំបង្ខាំងជាមុនសិន បន្ទាប់មកអញ្ជើញមកបំពេញពាក្យសុំបង្ខាំងប័ណ្ណ និងបំពេញពាក្យស្នើសុំប័ណ្ណថ្មីជំនួសប័ណ្ណចាស់ដែលបាត់ ។
តើធនាគារអេស៊ីលីដា គិតកម្រៃសេវាប៉ុន្មានចំពោះការចេញប័ណ្ណមាសអេស៊ីលីដាថ្មីជំនួសប័ណ្ណចាស់ ?
គិតកម្រៃសេវា ៥ដុល្លារអាមេរិក សម្រាប់ប័ណ្ណមាសអេស៊ីលីដាមួយ ចំពោះការចេញប័ណ្ណថ្មីជំនួសប័ណ្ណចាស់ ។
ដើម្បីអាចប្រើប្រាស់ប័ណ្ណមាសអេស៊ីលីដាបាន តើខ្ញុំត្រូវធ្វើដូចម្តេច ?
ដើម្បីអាចប្រើប្រាស់ប័ណ្ណមាសអេស៊ីលីដាបាន លោកអ្នកត្រូវ ៖
- មានប័ណ្ណមាសអេស៊ីលីដា
- មានលេខសម្ងាត់ (PIN Code) ៦ខ្ទង់ ដែលបេឡាធិការប្រគល់ជូន
- ដឹងពីនីតិវិធីប្រើប្រាស់ប័ណ្ណ ដែលភ្នាក់ងារបម្រើអតិថិជនរបស់ធនាគារអេស៊ីលីដាពន្យល់យ៉ាងក្បោះក្បាយនៅពេលប្រគល់ប័ណ្ណជូនដំបូង
- ស្គាល់ពីទីតាំងធនាគារអេស៊ីលីដា ដែលមានបំពាក់ម៉ាស៊ីនអេធីអឹម និង ទីតាំងហាង ផ្សារ សណ្ឋាគារ និងទីកន្លែងផ្សេងៗដែលមានបំពាក់ម៉ាស៊ីនឆូតកាតអេស៊ីលីដា
ប្រសិនបើខ្ញុំមានប័ណ្ណអេស៊ីលីដាហើយ តើខ្ញុំអាចស្នើសុំប័ណ្ណមាសអេស៊ីលីដាបានឬទេ ?
- លោកអ្នកអាចស្នើសុំប័ណ្ណមាសអេស៊ីលីដាបាន ទោះបីជាមានប័ណ្ណអេស៊ីលីដាធម្មតាហើយក៏ដោយ
- ក្នុងករណីលោកអ្នកមានប័ណ្ណអេស៊ីលីដាធម្មតាពីរ នោះលោកអ្នកត្រូវបង្វែរប័ណ្ណអេស៊ីលីដាបន្សំ មកធនាគារវិញសិន ទើបលោកអ្នកអាចស្នើសុំប័ណ្ណមាសអេស៊ីលីដាមួយទៀតបាន

សេវាទូទាត់តាមរយៈម៉ាស៊ីនអេធីអឹម

ដូចម្តេចដែលហៅថា សេវាទូទាត់តាមរយៈម៉ាស៊ីនអេធីអឹម ?
សេវាទូទាត់តាមរយៈម៉ាស៊ីនអេធីអឹម គឺជាសេវាប្រមូលសាច់ប្រាក់មួយប្រភេទដែលអតិថិជនអាចធ្វើការបង់ប្រាក់ ឬទូទាត់ថ្លៃទំនិញ-សេវាកម្ម ឬទូទាត់វិក្កយបត្ររបស់ខ្លួនទៅឱ្យ អ្នកផ្គត់ផ្គង់តាមរយៈប័ណ្ណអេស៊ីលីដា ជាមួយម៉ាស៊ីនអេធីអឹម របស់ធនាគារ អេស៊ីលីដា ។
តើអតិថិជនរបស់អគ្គិសនីកម្ពុជានៅកន្លែងណាខ្លះ ដែលអាចទូទាត់តាមរយៈម៉ាស៊ីនអេធីអឹមបាន ?
អតិថិជនដែលមានទីតាំងប្រើប្រាស់ថាមពលអគ្គិសនីនៅរាជធានីភ្នំពេញ និងខេត្តកណ្តាល ។
តើខ្ញុំត្រូវធ្វើដូចម្តេច ដើម្បីប្រើប្រាស់សេវានេះបាន ?
- លោកអ្នក ត្រូវមានគណនីជាមួយធនាគារ អេស៊ីលីដា ដែលគណនីនោះអាចជា គណនីបញ្ញើសំចៃ គណនីបញ្ញើតាមតម្រូវការ ឬគណនីចរន្ត ។
- ត្រូវមានប័ណ្ណអេស៊ីលីដាធម្មតា ប័ណ្ណមាសអេស៊ីលីដា ឬប័ណ្ណឥណពន្ធវីសាអេស៊ីលីដា ។
- ត្រូវប្រាកដថាមានទឹកប្រាក់គ្រប់គ្រាន់ ក្នុងគណនីសម្រាប់ដំណើរការសេវាទូទាត់ ។
តើប្រភេទប្រាក់ណាខ្លះ ដែលអាចទូទាត់បាន ?
ប្រភេទប្រាក់ដែលអាចទូទាត់បាន មានដូចជា ៖ ប្រាក់ដុល្លារ ប្រាក់រៀល ឬប្រាក់បាត ។
តើធនាគារគិតកម្រៃសេវាយ៉ាងដូចម្តេច ?
ធនាគារគិតកម្រៃសេវា ០,២៥ដុល្លារ ឬសមមូលជាប្រាក់រៀល ឬប្រាក់បាត ក្នុងមួយប្រតិបត្តិការ ។
តើខ្ញុំអាចទូទាត់ក្រោយថ្ងៃផុតកំណត់លើវិក្កយបត្របានដែរឬទេ ?
លោកអ្នក មិនអាចទូទាត់ក្រោយថ្ងៃផុតកំណត់លើវិក្កយបត្របានទេ គឺលោកអ្នកត្រូវទូទាត់ឱ្យបានមុនថ្ងៃផុតកំណត់លើវិក្កយបត្រ យ៉ាងតិចបំផុតពីរថ្ងៃនៃថ្ងៃធ្វើការ និងទូទាត់ឱ្យបានមុនម៉ោង០៣:០០នាទី ល្ងាច ។
ប្រសិនបើខ្ញុំប្រើប្រាស់ថាមពលអគ្គិសនីនៅរាជធានីភ្នំពេញ តើខ្ញុំអាចទៅបង់ប្រាក់តាមរយៈម៉ាស៊ីនអេធីអឹម នៅតាមបណ្តាខេត្ត-រាជធានីផ្សេងៗបានដែរឬទេ ?
លោកអ្នក អាចទូទាត់ថ្លៃប្រើប្រាស់ថាមពលអគ្គិសនីតាមរយៈម៉ាស៊ីនអេធីអឹមរបស់ធនាគារអេស៊ីលីដា បានទូទាំងខេត្ត-រាជធានីនៅក្នុងប្រទេសកម្ពុជា ។

សេវាទូទាត់តាមរយៈសារអេឡិចត្រូនិក

តើសេវាទូទាត់តាមរយៈសារអេឡិចត្រូនិកជាអ្វី ?
សេវាទូទាត់តាមរយៈសារអេឡិចត្រូនិក គឺជាប្រតិបត្តិការផ្ទេរប្រាក់ ឬដកប្រាក់ពីគណនី តាមសំណូមពររបស់ម្ចាស់គណនី ដែលបានផ្ញើអ៊ីម៉ែលមកលោកនាយកប្រតិបត្តិប្រតិបត្តិការ ឬនាយក-នាយិកាសាខារបស់ធនាគារអេស៊ីលីដា ដើម្បីបញ្ជាឱ្យធ្វើការទូទាត់ ។
តើសេវាទូទាត់តាមរយៈសារអេឡិចត្រូនិកផ្តល់អត្ថប្រយោជន៍អ្វីខ្លះ ?
សេវានេះបានផ្តល់អត្ថប្រយោជន៍ និងភាពងាយស្រួលជូនដល់លោកអ្នកក្នុងការទូទាត់ទំនិញ ផ្ទេរប្រាក់ ឬដកប្រាក់បានយ៉ាងឆាប់រហ័សទៅឱ្យក្រុមគ្រួសារ សាច់ញាតិ ឬអ្នកទទួលផល តាមការបញ្ជារបស់ម្ចាស់គណនីដែលបានផ្ញើអ៊ីម៉ែលមកកាន់ធនាគារអេស៊ីលីដា ។
តើខ្ញុំត្រូវធ្វើដូចម្តេច ដើម្បីស្នើសុំប្រើប្រាស់សេវាទូទាត់តាមរយៈសារអេឡិចត្រូនិក ?
- អញ្ជើញមកកាន់ការិយាល័យធនាគារអេស៊ីលីដា ដែលនៅជិតលោកអ្នក ដើម្បីបំពេញពាក្យស្នើសុំប្រើប្រាស់សេវាជាមុន ដោយបញ្ជាក់ពីអាសយដ្ឋានអ៊ីម៉ែល ឱ្យបានច្បាស់លាស់ ។
- ត្រូវមានគណនីជាមួយធនាគារអេស៊ីលីដា ។
តើខ្ញុំត្រូវធ្វើដូចម្តេច នៅពេលប្រើប្រាស់សេវានេះ ?
- ត្រូវផ្ញើអ៊ីម៉ែល មកលោកនាយកប្រតិបត្តិប្រតិបត្តិការ ឬនាយក-នាយិកាសាខា ដែលលោកអ្នកមានគណនី នៅពេលមានតម្រូវការផ្ទេរប្រាក់ ឬដកប្រាក់ឱ្យអ្នកទទួលផល ។
- ត្រូវបញ្ជាក់នូវព័ត៌មានរបស់អ្នកទទួលផល
តើខ្ញុំអាចទូទាត់ប្រាក់តាមរយៈសេវាសារអេឡិចត្រូនិក បានចំនួនប៉ុន្មានក្នុងមួយថ្ងៃ ?
លោកអ្នកអាចទូទាត់ប្រាក់បានរហូតដល់ ៥.០០០ដុល្លារ ឬសមមូល ក្នុងមួយថ្ងៃ ។
ប្រសិនបើខ្ញុំទៅក្រៅប្រទេស តើខ្ញុំអាចធ្វើការបញ្ជាផ្ទេរប្រាក់ ពីក្រៅប្រទេសឱ្យទៅអ្នកទទួលផលនៅធនាគារអេស៊ីលីដាដូចគ្នាបានដែរឬទេ ?
ប្រសិនបើលោកអ្នកទៅក្រៅប្រទេស លោកអ្នកក៏អាចធ្វើការបញ្ជាផ្ទេរប្រាក់ពីក្រៅប្រទេស ឱ្យទៅអ្នកទទួលផលនៅធនាគារអេស៊ីលីដាដូចគ្នាបានផងដែរ នៅពេលដែលលោកអ្នកបានស្នើសុំប្រើប្រាស់សេវាទូទាត់តាមរយៈសារអេឡិចត្រូនិករួចហើយ ។

សំគាល់ ៖ ធនាគារអេស៊ីលីដា សូមរក្សាសិទ្ធិក្នុងការកែប្រែថ្លៃសេវាកម្មដោយមិនចាំបាច់ជូនដំណឹងជាមុនឡើយ ។ សម្រាប់តម្រូវការប្រើប្រាស់សេវាធនាគារ និងព័ត៌មានផ្សេងៗទៀត សូមទាក់ទងមកការិយាល័យទំនាក់ទំនងអតិថិជន ។

យោបល់លោកអ្នក

ទំព័រដែលពាក់ព័ន្ធ

សំណួរ​អតិថិជន អំពី​សេវា​ធនាគារ​អេឡិចត្រូនិក

សេវា​អេស៊ីលីដា​យូនីធី

ម៉ាស៊ីន​ឆូតកាត អេស៊ីលីដា

សេវា​ប័ណ្ណ​ឥណពន្ធ​វីសា​អេស៊ីលីដា