ព័ត៌មានហិរញ្ញវត្ថុរបាយការណ៍ប្រធានក្រុមប្រឹក្សាភិបាល

របាយការណ៍ប្រធានក្រុមប្រឹក្សាភិបាល

លោក ឆាយ សឿន ប្រធានក្រុមប្រឹក្សាភិបាល

តាងនាមឱ្យធនាគារ អេស៊ីលីដា ភីអិលស៊ី ("ធនាគារ") និងក្រុមប្រឹក្សាភិបាល ខ្ញុំបាទមានកិត្តិយស និងសេចក្តីសោមនស្ស បង្ហាញបង្ហាញជូន របាយការណ៍ប្រចាំឆ្នាំ២០២០ របស់ធនាគារ ។

ឆ្នាំ២០២០ គឺជាឆ្នាំដែលមានការលំបាកសម្រាប់ស្ទើរគ្រប់វិស័យ ជាពិសេសទាក់ទងទៅនឹងវិស័យទេសចរណ៍។ ការរាតត្បាតជាសកលនៃជំងឺកូវីដ-១៩ បាននិងកំពុងជះឥទ្ធិពលអវិជ្ជមានយ៉ាងខ្លាំងដល់អាជីវកម្មគ្រប់វិស័យទាំងអស់នៅជុំវិញពិភពលោក រួមទាំងព្រះរាជាណាចក្រកម្ពុជាផងដែរ។ ស្របពេលជាមួយគ្នា រាជរដ្ឋាភិបាលកម្ពុជាបានដោះស្រាយស្ថានការណ៍ដ៏លំបាកនេះបានយ៉ាងល្អប្រសើរគួរជាទីមោទកភាព។ ជាលទ្ធផល ឧស្សាហកម្មធំៗត្រូវបានការពារយ៉ាងល្អពីផលប៉ះពាល់នៃជំងឺរាតត្បាតដ៏គួរឲ្យភ័យខ្លាចមួយនេះ។

រីឯកំណើនក្នុងវិស័យហិរញ្ញវត្ថុវិញ គឺនៅតែអាចរក្សាបាននូវអត្រាកំណើនប្រហាក់ប្រហែលនឹងឆ្នាំមុន ហើយស្ថានភាពបែបនេះត្រូវបានចាត់ទុកថា ជាការរក្សាបាននូវស្ថិរភាពដ៏ល្អនៅក្នុងអំឡុងពេលនៃវិបត្តិនេះ។ ទោះជាយ៉ាងណាក៏ដោយ ក៏មានសញ្ញាជាច្រើនបានបង្ហាញថា សកម្មភាពសេដ្ឋកិច្ចនឹងចាប់ផ្តើមរីកចម្រើនឡើងវិញនៅក្នុងឆ្នាំ២០២១ ដោយសារប្រសិទ្ធភាពនៃវ៉ាក់សាំងការពារជំងឺកូវីដ-១៩ ដែលនឹងត្រូវបានដាក់ឲ្យប្រើប្រាស់នៅទូទាំងពិភពលោក។

ដោយឡែក សម្រាប់ដំណើរការអាជីវកម្មរបស់ធនាគារនៅក្នុងឆ្នាំ២០២០ ក្រោមស្ថានភាពដ៏លំបាកនៃការរាតត្បាតជាសកលនៃជំងឺកូវីដ-១៩ និងដើម្បីឲ្យការផ្តល់សេវាកម្មហិរញ្ញវត្ថុប្រកបដោយគុណភាព ស្របតាមតម្រូវការរបស់សាធារណជន ធនាគារបានពង្រីកបណ្តាញស្វ័យប្រតិបត្តិការ អភិវឌ្ឍសេវាធនាគារឌីជីថល អេស៊ីលីដាម៉ូបាល (ACLEDA mobile) ឲ្យកាន់តែមានភាពងាយស្រួល រហ័សទាន់ចិត្ត និងមានសុវត្ថិភាពខ្ពស់។ ស្របតាមការអនុវត្តនេះ ធនាគារសម្រេចបាននូវលទ្ធផលជាវិជ្ជមាន ដូចខាងក្រោម៖

គិតត្រឹមថ្ងៃទី៣១ ខែធ្នូ ឆ្នាំ២០២០ ប្រាក់បញ្ញើសរុបបានកើនឡើងចំនួន ២៤៣,៤ លានដុល្លារអាមេរិក ហើយសមតុល្យឥណទានសរុបបានកើនឡើងចំនួន ៦២៧,១៨ លានដុល្លារអាមេរិក បើធៀបនឹងដំណាច់ឆ្នាំ២០១៩។

បើធៀបលទ្ធផលប្រចាំឆ្នាំ២០២០ នេះ ទៅនឹងលទ្ធផលឆ្នាំ២០១៩ ធនាគារ អេស៊ីលីដា ភីអិលស៊ី ទទួលបានប្រាក់ចំណេញសុទ្ធចំនួន ១៤១,៤៩ លានដុល្លារអាមេរិក ដោយកើនឡើង ១៧,០៧% ស្មើនឹង ២០,៦៣ លានដុល្លារអាមេរិក។ ជាលទ្ធផល អនុបាតចំណេញធៀបនឹងទ្រព្យសកម្មមធ្យម ចំនួន ២,២៣% ដោយកើនឡើងចំនួន ០,១៩% និង អនុបាតចំណេញធៀបនឹងមូលធនមធ្យម ចំនួន ១៣,៧៩% ដោយកើនឡើងចំនួន ០,៤៩%។

គិតចាប់ពីថ្ងៃដែលធនាគារចុះបញ្ជីលក់មូលបត្រកម្មសិទិ្ធ រហូតមកដល់ដំណាច់ឆ្នាំ២០២០ វិនិយោគិនសាធារណៈរបស់ធនាគារបានកើនឡើងចំនួន ៤២,៦៣% (កើនឡើងពី ២.៤៩៦នាក់ ដល់ ៣.៥៦០នាក់)។ យោងតាមព្រឹត្តិបត្រព័ត៌មានប្រចាំខែរបស់ក្រុមហ៊ុនផ្សារមូលបត្រកម្ពុជា (ផ.ម.ក.) ដែលបានចេញផ្សាយនៅខែធ្នូ ឆ្នាំ២០២០ មូលធនរូបនីយកម្មទីផ្សារសរុប មានកំណើនដល់ ២,៤៥ ពាន់លានដុល្លារអាមេរិក កើនឡើងជិត ២៥០% ធៀបនឹងឆ្នាំ២០១៩។ ការចុះបញ្ជីរបស់ធនាគារ អេស៊ីលីដា ភីអិលស៊ី ដែលជាធនាគារដ៏ធំជាងគេក្នុងស្រុក បានបងើ្កនសកម្មភាពជួញដូរលើទីផ្សារមូលបត្រកម្ពុជា ដោយជំរុញការជួញដូរប្រចាំថ្ងៃរហូតដល់ ១ លានដុល្លារអាមេរិក ក្នុងរយៈពេលជាច្រើនថ្ងៃជាប់ៗគ្នា។

យើងខ្ញុំសូមថ្លែងអំណរគុណ និងសំដែងនូវការដឹងគុណយ៉ាងជ្រាលជ្រៅចំពោះ ភាគហ៊ុនិក, អតិថិជន, និយោជិត និងជាពិសេសអាជ្ញាធរពាក់ព័ន្ធទាំងអស់ ដែលតែងតែផ្តល់ការគាំទ្រ និងការជ្រោមជ្រែងឲ្យធនាគារសម្រេចបាននូវលទ្ធផលតាមផែនការដ៏ត្រចះត្រចង់ ជាពិសេសក្នុងឆ្នាំ២០២០ នេះ។

លោក ឆាយ សឿន
ប្រធានក្រុមប្រឹក្សាភិបាល ធនាគារ អេស៊ីលីដា ភីអិលស៊ី
ថ្ងៃទី២៤ ខែមីនា ឆ្នាំ២០២១

របាយការណ៍​ប្រធាន​ក្រុម​ប្រឹក្សាភិបាល

របាយការណ៍ប្រធានក្រុមប្រឹក្សាភិបាល