ព័ត៌មានហិរញ្ញវត្ថុរបាយការណ៍ប្រធាននាយកប្រតិបត្តិ

របាយការណ៍ប្រធាននាយកប្រតិបត្តិ

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី

ទោះបីជាស្ថិតក្នុងអន្តរកាលនៃផលប៉ះពាល់ជាសកលពីការរាតត្បាតជំងឺកូវីដ-១៩ ធនាគារបានខិតខំវិវឌ្ឍខ្លួន ដោយធ្វើការកែប្រែស្លាកសញ្ញាឡើងវិញជាមួយនឹងរូបរាងថ្មី ដើម្បីឆ្លុះបញ្ចាំងពីប្រវត្តិពិតរបស់ធនាគារ។ ឆ្នាំ២០២០ បានផ្តល់បទពិសោធន៍បន្ថែមយ៉ាងច្រើនដល់ធនាគារនូវមធ្យោបាយចម្បងចំនួនពីររួមមាន៖

ទីមួយ ធនាគារបានពង្រឹងខ្លួនឯង តាមរយៈការជម្នះរាល់ហេតុការណ៍អវិជ្ជមានឲ្យក្លាយទៅជាគុណសម្បត្តិវិញ។ តាមបរិបទនេះយើងបានកត់សម្គាល់ឃើញថា អាជីវកម្មរបស់ធនាគារនៅតែបន្តរីកចម្រើន ព្រមទាំងអាចរក្សាបាននូវគុណភាពទ្រព្យសកម្មបានយ៉ាងល្អ។

ទីពីរ ធនាគារ អេស៊ីលីដា ភីអិលស៊ី គឺជាធនាគារពាណិជ្ជដំបូងបង្អស់ ដែលបានចុះបញ្ជីលក់មូលបត្រកម្មសិទ្ធិ ក្នុងក្រុមហ៊ុនផ្សារមូលបត្រកម្ពុជា (ផ.ម.ក.) ដូច្នេះធនាគារបានធ្វើកំណែទម្រង់ប្រតិបត្តិការ និងស្តង់ដារបាយការណ៍ ដើម្បីឆ្លើយតបទៅនឹងតម្រូវការបទដ្ឋានរបស់ធនាគារជាតិ នៃ កម្ពុជា, និយ័តករមូលបត្រកម្ពុជា (ន.ម.ក.), និង ផ.ម.ក.។ មុនពេលចុះបញ្ជីក្នុង ផ.ម.ក. នៅក្នុងខែឧសភា ឆ្នាំ២០២០ ធនាគារមានភាគហ៊ុនិកជានីតិបុគ្គល ចំនួន៨។ បន្ទាប់ពីបានចុះបញ្ជីរួច ធនាគារមានភាគហ៊ុនិកថ្មីកើនឡើងជិត ៤០០០នាក់ ដោយមានទាំងនីតិបុគ្គល និងរូបវន្តបុគ្គល ដែលបានបណ្តាក់ទុនជាមួយធនាគារប្រកបដោយទំនុកចិត្ត។

សូមថ្លែងអំណរគុណចំពោះបច្ចេកវិទ្យាឌីជីថល ដែលធនាគារបានធ្វើការអភិវឌ្ឍ និងការកែលម្អជាច្រើនឆ្នាំមកនេះ បានរួមចំណែកយ៉ាងសកម្មក្នុងការសម្រេចបាននូវសមិទ្ធិផលដ៏ត្រចះត្រចង់នេះ ទាំងក្នុងដំណើរការអាជីវកម្ម និងទំនាក់ទំនងដ៏រឹងមាំជាមួយនិយ័តករ និងភាគហ៊ុនិកយ៉ាងច្រើនបែបនេះបានក្នុងពេលតែមួយ។

សមិទ្ធិផលសម្រេចបានក្នុងឆ្នាំ២០២០

ស្ថានភាពប្រកួតប្រជែង

ដំណោះស្រាយឌីជីថលយ៉ាងសកម្មបានក្លាយជាជម្រើសដ៏ល្អបំផុតសម្រាប់ធនាគារ និងស្ថាប័នហិរញ្ញវត្ថុ ក្នុងការផ្តល់សេវាកម្មជូនអតិថិជនរបស់ខ្លួននៅក្នុងអំឡុងពេលនៃការរីករាលដាលនៃជំងឺកូវីដ-១៩ ដែលសាធារណជនជាច្រើនមានក្តីព្រួយបារម្ភយ៉ាងខ្លាំងអំពីសុខភាពរបស់ពួកគេ។ បច្ចេកវិទ្យាឌីជីថលត្រូវបានជឿថា គឺជាឧបករណ៍មួយ ក្នុងចំណោមឧបករណ៍ដ៏មានសក្តានុពលបំផុត ដើម្បីបំពេញបន្ថែម និងឆ្លើយតបតម្រូវការទីផ្សារបច្ចុប្បន្ន ចំពោះគ្រប់ស្ថាប័នហិរញ្ញវត្ថុ។ ធនាគារ តែងតែពង្រឹងគុណភាពបម្រើសេវាកម្មហិរញ្ញវត្ថុដល់អតិថិជនគ្រប់មជ្ឈដ្ឋាន ដើម្បីទទួលបានភាពរីកចម្រើនជាមួយគ្នា ទាំងនៅក្នុងប្រទេស និងក្រៅប្រទេស តាមរយៈការទូទាត់ឆ្លងព្រំដែន ដោយឃ្យូអរកូដ (QR Code)។

ចំណុចសំខាន់ៗនៃប្រតិបត្តិការក្នុងឆ្នាំ២០២០

សមតុល្យឥណទានសរុបនៅចុងឆ្នាំ២០២០មានចំនួន ៤.៥០៦,៦៤ លានដុល្លារអាមេរិក ក្នុងនោះមានឥណទានចំនួន ៨៩៤,៦៥ លានដុល្លារអាមេរិក ស្មើនឹង ១៩,៨៥% បានផ្តល់ទៅឲ្យវិស័យកសិកម្ម។ បើធៀបទៅនឹងឆ្នាំ២០១៩ ការផ្តល់ឥណទានក្នុងវិស័យកសិកម្មមានចំនួន ៧៥៧,០៤ លានដុល្លារអាមេរិក។ គិតត្រឹមដំណាច់ខែធ្នូ ឆ្នាំ២០២០ ចំនួនអតិថិជនឥណទានអាជីវកម្មខ្នាតតូចរបស់ធនាគារបានកើនដល់ ៤៤៩.៣៥២នាក់។
ឥណទានមិនដំណើរការស្ថិតក្នុងអត្រាដែលអាចគ្រប់គ្រងបាន មានចំនួន ២,៤០% នៅក្នុងអំឡុងនៃវិបត្តិកូវីដ-១៩នេះ។
ប្រាក់បញ្ញើ-សន្សំមានចំនួន ៤.៦១១,៣០ លានដុល្លារអាមេរិក ដែលមានគណនីសកម្មចំនួន ២.៨៩៤.៩០៧។
ធនាគារទទួលបានប្រាក់ចំណេញសុទ្ធចំនួន ១៤១,៦៦ លានដុល្លារអាមេរិក។
ធនាគារនៅតែបន្តកាត់បន្ថយចំណាយ និងត្រួតពិនិត្យហានិភ័យជាប្រចាំ ដើម្បីទទួលបានប្រាក់ចំណេញខ្ពស់បំផុត។
សេវាធនាគារអេឡិចត្រូនិចតាមប្រព័ន្ធបច្ចេកវិទ្យាហិរញ្ញវត្ថុ (FinTech) បានបញ្ចូលជាមួយនឹងហេដ្ឋារចនាសម្ព័ន្ធធនាគារអេឡិចត្រូនិកផ្សេងទៀតរបស់ធនាគារ ដើម្បីផ្តល់ជម្រើសជាច្រើនជូនអតិថិជន ក្នុងការគ្រប់គ្រងធនធានហិរញ្ញវត្ថុរបស់ពួកគេ។

សេវាលក់រាយ និងអាជីវកម្មខ្នាតតូច

ឥណទានខ្នាតតូចបានកើនឡើង ១០,១% ឬស្មើនឹង ២០២,៨៣ លានដុល្លារអាមេរិក និងឥណទានសម្រាប់ប្រើប្រាស់ផ្ទាល់ខ្លួន និងផ្សេងៗ បានកើនឡើង ៣២,២% ឬស្មើនឹង ៣៨,៥៥ លានដុល្លារអាមេរិក។ ចំណែកឥណទានគេហដ្ឋានបានថយចុះ ១២,២៧% ឬស្មើនឹង ២២,៥ លានដុល្លារអាមេរិក។ សមតុល្យឥណទានសរុបចំនួន ៤.៥០៦,៦៤ លានដុល្លារអាមេរិក នៅដំណាច់ឆ្នាំ២០២០។

ធនាគារ អេស៊ីលីដា ភីអិលស៊ី មានសមតុល្យប្រាក់បញ្ញើ-សន្សំសរុបចំនួន ៤.៦១១,៣ លានដុល្លារអាមេរិក (កើនឡើង ៥,៥៧% ឬស្មើនឹង ២៤៣,៤ លានដុល្លារអាមេរិក) និងមានគណនីសរុបជាង ២,៨៩ លានគណនី។ វិស័យលក់រាយគឺជាផ្នែកដែលធំជាងគេបំផុតនៃកំណើនប្រាក់បញ្ញើសរុប ដែលភាគច្រើនបានមកពីអតិថិជនដាក់ប្រាក់បញ្ញើដំបូង ដូចជាកម្មករនិយោជិត តាមរយៈសេវាបើកប្រាក់បៀវត្ស និងអតិថិជននៅតាមជនបទ ដែលពួកគាត់បានប្រើប្រាស់គណនីវ៉លឡេតរបស់អេស៊ីលីដាម៉ូបាល។ ការពង្រីកផលិតផល និងសេវាកម្មហិរញ្ញវត្ថុ តាមរយៈ FinTech បានចូលរួមចំណែកធ្វើឲ្យមានកំណើនយ៉ាងខ្លាំងក្លា។

ធនាគារ អេស៊ីលីដា ភីអិលស៊ី កំពុងតែអភិវឌ្ឍនូវហេដ្ឋារចនាសម្ព័ន្ធឲ្យកាន់តែទូលំទូលាយ សម្រាប់ជាជម្រើសដ៏សម្បូរបែបជាមួយនឹងសាខាទាំង ២៦៣ ទីតាំង (ឬការិយាល័យ) តាមរយៈការផ្លាស់ប្តូរបន្តិចម្តងៗ ទៅជាមជ្ឈមណ្ឌលដែលអាចធ្វើស្វ័យប្រតិបត្តិការ ព្រមទាំងមានម៉ាស៊ីនអេធីអឹមចំនួន ៧៩០គ្រឿង និងម៉ាស៊ីនឆូតកាតចំនួន ៤.២៨៧គ្រឿង។ ចំណុចគួរជាទីមោទកភាព គឺធនាគារ អេស៊ីលីដា បានបោះពុម្ពប័ណ្ណឥណពន្ធចំនួន ១,៤ លានប័ណ្ណជូនដល់អតិថិជន។ បន្ថែមលើនេះ អេស៊ីលីដាម៉ូបាល (ACLEDA mobile) បានទទួលប្រជាប្រិយភាពយ៉ាងខ្លាំង ដែលមានអ្នកចុះឈ្មោះប្រើប្រាស់ច្រើនជាង ១,៧ លាននាក់ នៅដំណាច់ឆ្នាំ២០២០នេះ។

ឥណទានខ្នាតមធ្យម និងសាជីវកម្ម

ក្នុងឆ្នាំ២០២០ ឥណទានប្រភេទនេះបានកើនឡើង ៣០,៨១% ដែលមានចំនួនស្មើនឹង ៣៥,០៦% នៃសមតុល្យឥណទានសរុប។ សេវាកម្មគ្រប់គ្រងសាច់ប្រាក់បានកើនឡើងយ៉ាងខ្លាំង តាមរយៈការចាប់ដៃគូជាមួយនឹងវិស័យសាធារណៈ ជាពិសេសបេឡាជាតិសន្តិសុខសង្គម សេវាបើកប្រាក់បៀវត្សសម្រាប់មន្ត្រីរាជការ សេវាប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ រួមទាំងក្រុមហ៊ុនឯកជនជាច្រើន ជាពិសេសរោងចក្រកាត់ដេរ។ ក្នុងនាមជាអ្នកគ្រប់គ្រងមូលនិធិបេឡាជាតិសន្តិសុខសង្គម ធនាគារ អេស៊ីលីដា ភីអិលស៊ី អាចទទួលបានប្រាក់បញ្ញើពីទូទាំងរាជធានី-ខេត្ត។ លើសពីនេះទៀត អតិថិជនថ្មីៗជាច្រើនបានបើកគណនី ដោយសារការបង្កើននូវមធ្យោបាយបម្រើតាមរយៈប្រព័ន្ធអេឡិចត្រូនិក ដូចជា ការបន្ថែមម៉ាស៊ីនអេធីអឹម និងការទូទាត់វិក្កយបត្ររបស់ស្ថាប័នផ្សេងៗ តាមរយៈសេវាអេស៊ីលីដាម៉ូបាល ព្រមទាំងសេវាអេស៊ីលីដាអ៊ីនធើណែត ផងដែរ។ កត្តាទាំងនេះ បានធ្វើឲ្យធនាគារមានលទ្ធភាពប្រមូលនូវប្រភពធនធានហិរញ្ញវត្ថុ ជារូបិយវត្ថុរៀល និងអាចធ្វើឲ្យធនាគារពង្រឹង និងពង្រីកការផ្តល់ឥណទានជាប្រាក់រៀលបានកាន់តែច្រើនផងដែរ។ តម្រូវការប្រើប្រាស់សេវាបើកប្រាក់បៀវត្សបានកើនឡើងខ្លាំងនៅក្នុងឆ្នាំ២០២០ ដោយមានស្ថាប័នរដ្ឋាភិបាល និងមន្ត្រីរាជការ ព្រមទាំងក្រុមហ៊ុនធំៗក្នុងស្រុក និងក្រៅប្រទេស រួមទាំងស្ថាប័ននានា បានចូលរួមប្រើប្រាស់ ដែលជាឱកាសដ៏ល្អសម្រាប់ការលក់ផលិតផលផ្សេងៗទៀត។

ធនាគារ អេស៊ីលីដា ភីអិលស៊ី និងក្រុមហ៊ុនបុត្រសម្ព័ន្ធរបស់ខ្លួន នៅតែបន្តកិច្ចសហប្រតិបត្តិការជាមួយដៃគូយុទ្ធសាស្ត្ររយៈពេលវែង ដោយរួមបញ្ចូលគ្នានូវបទពិសោធន៍រាប់រយឆ្នាំក្នុងសេវាធនាគារ និងហិរញ្ញវត្ថុរបស់ដៃគូទាំងនោះ ដែលអាចជួយដល់អតិថិជនក្នុងការគ្រប់គ្រងធនធានហិរញ្ញវត្ថុរបស់ពួកគាត់ប្រកបដោយប្រសិទ្ធភាព និងប្រសិទ្ធផល។ ទន្ទឹមនឹងនោះ កិច្ចសហការនេះជួយជំរុញឲ្យធនាគារ អេស៊ីលីដា ទទួលបានប្រាក់ចំណូល ដើម្បីបង្កើនប្រភពមូលនិធិយូរអង្វែង សម្រាប់គាំទ្រទិសដៅយុទ្ធសាស្រ្តរបស់ខ្លួន។ ភាពជាដៃគូទាំងនេះ បានរួមចំណែកយ៉ាងសំខាន់ក្នុងការផ្តល់ប្រភពមូលនិធិរយៈពេលវែងដល់ធនាគារ អេស៊ីលីដា ភីអិលស៊ី និងជាប្រភពនៃប្រាក់ចំណូលក្រៅតារាងតុល្យការ។ ហើយម្យ៉ាងវិញទៀត ការចែករំលែកនូវជំនាញ និងបទពិសោធន៍ពីសំណាក់ដៃគូទាំងនោះ បានដើរតួយ៉ាងសំខាន់ និងរួមចំណែកដល់ការគ្រប់គ្រង និងការអភិវឌ្ឍសមត្ថភាពធនធានមនុស្សរបស់ធនាគារ។

រតនាភិបាល និងអន្តរជាតិ

ចំណូលពីសេវាប្តូរប្រាក់បន្តកើនឡើង និងចូលរួមបង្កើនចំណូលមិនមែនការប្រាក់របស់ធនាគារ។ ដោយយោងលើគោលការណ៍គ្រប់គ្រងហានិភ័យ ធនាគារ អេស៊ីលីដា ភីអិលស៊ី បម្រើសេវាប្តូរប្រាក់សម្រាប់តែគាំទ្រដល់អាជីវកម្មរបស់អតិថិជនប៉ុណ្ណោះ។ សេវានេះផ្តល់ប្រភពចំណូលដែលមានហានិភ័យទាប និងមានស្ថិរភាព ហើយមានកំណើនជាលំដាប់ និងរក្សាទំនាក់ទំនងយូរអង្វែងជាមួយអតិថិជន។

តាមរយៈការគ្រប់គ្រងស្ថានភាពរូបិយប័ណ្ណចំហបានល្អប្រសើរ បានធ្វើឲ្យតារាងតុល្យការរបស់ធនាគារកាន់តែរឹងមាំថែមទៀត ដែលញ៉ាំងឲ្យមានកំណើនប្រកបដោយគុណភាព និងបានធ្វើឲ្យអនុបាតឥណទានធៀបនឹងប្រាក់បញ្ញើមានភាពល្អប្រសើរ និងជួយទ្រទ្រង់ដល់ការរីកចម្រើននៅលើទីផ្សារ។

ធនាគារ អេស៊ីលីដា ភីអិលស៊ី បានចូលរួមចំណែកផ្សព្វផ្សាយការប្រើប្រាស់ប្រាក់រៀល តាមរយៈការផ្តល់ឥណទានជាប្រាក់រៀលដល់អតិថិជន ដែលមានចំនួនច្រើនជាង ១៤% នៃទំហំឥណទានសរុប ដែលលើសពីបញ្ញត្តិតម្រូវត្រឹមតែ ១០% ប៉ុណ្ណោះ។ ធនាគារក៏បានចូលរួមយ៉ាងសកម្មនៅក្នុងប្រតិបត្តិការផ្តល់សន្ទនីយភាពដោយមានការធានា (LPCO) ដើម្បីទុកជាប្រភពទុនបន្ថែមជាប្រភេទរូបិយវត្ថុក្នុងស្រុក។

បន្ថែមពីនេះទៀត ធនាគារ អេស៊ីលីដា ភីអិលស៊ី បានរក្សាទំនាក់ទំនងល្អជាមួយនឹងដៃគូយុទ្ធសាស្ត្រទូទាំងសកលលោក ជាពិសេសនៅអឺរ៉ុប សហរដ្ឋអាមេរិក និងអាស៊ី ដើម្បីគាំទ្រដល់ធនាគារ ក្នុងការផ្តល់ប្រភពមូលនិធិរយៈពេលវែង។

ធនាគារនៅតែបន្តពង្រឹងទំនាក់ទំនងជាមួយស្ថាប័នហិរញ្ញវត្ថុជាច្រើន និងបានបង្កើនធនាគារដៃគូក្រៅប្រទេសថ្មីៗ ជាច្រើនបន្ថែមទៀត ដើម្បីពង្រីកបណ្តាញប្រតិបត្តិការរបស់ខ្លួន។ នាដំណាច់ឆ្នាំ២០២០ ធនាគារមានធនាគារដៃគូចំនួន ២៧៤ នៅក្នុងចំណោម ៤៤ប្រទេស។ លើសពីនេះទៀត ធនាគារមានចំណែកទីផ្សារលើសលុប ក្នុងការគ្រប់គ្រងគណនីរបស់ធនាគារ និងស្ថាប័នហិរញ្ញវត្ថុក្នុងស្រុក ព្រមទាំងផ្តល់សេវាផ្ទេរប្រាក់ដល់ស្ថាប័នទាំងនោះនៅទូទាំងប្រទេស។

ធនាគារក៏បានរៀបចំ និងអនុវត្តបានទាំងស្រុង តាមគោលការណ៍គ្រប់គ្រងហានិភ័យផ្ទៃក្នុង តម្រូវការបទប្បញ្ញត្តិ និងកិច្ចព្រមព្រៀងជាមួយនឹងម្ចាស់បំណុលនានា។

យុទ្ធសាស្រ្តអាទិភាពសម្រាប់ឆ្នាំ២០២១

បន្តអភិវឌ្ឍបច្ចេកវិទ្យាហិរញ្ញវត្ថុ FinTech តាមរយៈកម្មវិធី អេស៊ីលីដាម៉ូបាល ដើម្បីផ្តល់បណ្តាញសេវាកម្មហិរញ្ញវត្ថុក្នុងតំបន់ និងបង្កើនកម្មវិធីស្វ័យសេវាកម្មសម្រាប់អតិថិជន។
អភិវឌ្ឍហេដ្ឋារចនាសម្ព័ន្ធតំបន់ស្វ័យសេវាកម្មធនាគារ ដើម្បីបម្រើសាធារណជន និងអតិថិជន ២៤ម៉ោងក្នុង១ថ្ងៃ និង៧ថ្ងៃក្នុង១សប្តាហ៍។
អភិវឌ្ឍអត្តសញ្ញាណថ្មី និងពង្រឹងបន្ថែមនូវកេរ្តិ៍ឈ្មោះរបស់ធនាគារ។
លើកកម្ពស់សមត្ថភាពប្រកួតប្រជែងដល់ក្រុមហ៊ុនបុត្រសម្ព័ន្ធទាំងក្នុងស្រុក និងក្រៅប្រទេស។
ធ្វើទំនើបកម្មប្រព័ន្ធឌីជីថល សម្រាប់គាំទ្រនូវដំណើរការ និងឯកសាររដ្ឋបាលផ្សេងៗ។
បង្កើនប្រព័ន្ធ និងសុវត្ថិភាពបច្ចេកវិទ្យាព័ត៌មាន សម្រាប់មុខងារឌីជីថលឲ្យកាន់តែរឹងមាំ។
ចាប់ដៃគូជាមួយស្ថាប័ននានាដែលមានកេរ្តិ៍ឈ្មោះល្អ សម្រាប់កំណើនអាជីវកម្ម។
ដើរតួនាទីជាអ្នកថែរក្សា និងធ្វើពិពិធកម្មមូលនិធិ ដែលទទួលបានពីផ្សារមូលបត្រកម្ពុជា និងវិនិយោគិនទូទាំងពិភពលោក និង
ធ្វើឲ្យសេវា អេស៊ីលីដាម៉ូបាល ក្លាយជាសេវាដែលអាចទូទាត់កាន់តែទូលំទូលាយក្នុងទីផ្សារទាំងអស់។

បញ្ហាចម្បងក្នុងឆ្នាំ២០២១

ក្នុងនាមជាក្រុមហ៊ុនចុះបញ្ជីមួយ ធនាគារ អេស៊ីលីដា ភីអិលស៊ី ត្រូវតែអនុលោមតាមបទប្បញ្ញត្តិរបស់ធនាគារជាតិ នៃ កម្ពុជា និង ន.ម.ក. ហើយនេះក៏ជាទំនួលខុសត្រូវរបស់ធនាគារចំពោះសាធារណជន និងវិនិយោគិនផងដែរ។ ក្នុងប្រវត្តិជាច្រើនឆ្នាំរបស់ខ្លួន ធនាគារ អេស៊ីលីដា ភីអិលស៊ី បានបង្កើតទំនុកចិត្តដល់សាធារណជន តាមរយៈអភិបាលកិច្ចសាជីវកម្មល្អ គណៈគ្រប់គ្រងដែលមានបទពិសោធន៍យូរឆ្នាំ ព្រមទាំងមានវប្បធម៌ការងារប្រកបដោយតម្លាភាព។

ហេដ្ឋារចនាសម្ព័ន្ធឌីជីថល និងផលិតផល FinTech បានធ្វើឲ្យទីផ្សារហិរញ្ញវត្ថុមានភាពសម្បូរបែប។ តាមរយៈនេះវាបានជួយលុបបំបាត់គម្លាតរបស់អតិថិជនក្នុងទីផ្សារហិរញ្ញវត្ថុ ព្រមទាំងញ៉ាំងឲ្យអតិថិជនមានជម្រើសក្នុងចំណោមធនាគារ និងស្ថាប័នហិរញ្ញវត្ថុ ដោយលែងខ្វល់អំពីតំបន់រស់នៅរបស់ពួកគេទៀត។ សេវា FinTech ក៏ជួយជំរុញដល់ការប្រកួតប្រជែងខ្លាំងក្លា ទាំងគុណភាព និងតម្លៃនៃសេវាកម្ម។ "អេស៊ីលីដាម៉ូបាល" គឺបំពាក់មកជាមួយនូវបច្ចេកវិទ្យាជំនាន់ចុងក្រោយបំផុត ដែលមានរូបភាពទាន់សម័យគួរឲ្យទាក់ទាញសម្រាប់គ្រប់វ័យ។ វាត្រូវបានបង្កើតឡើងជាមួយនឹងបទពិសោធន៍របស់អតិថិជន និងអ្នកប្រើប្រាស់ដ៏មានប្រជាប្រិយភាព។ វាមានសុវត្ថិភាពខ្ពស់ និងអាចទាញយកដោយខ្លួនឯងនៅកន្លែងណា ដែលមាន Wi-Fi ឬអ៊ីនធើណែត ហើយវាក៏ជាដំណោះស្រាយមួយដែរ ដើម្បីជួយឱ្យធនាគារ អេស៊ីលីដា ឈានមុខក្នុងការប្រកួតប្រជែង។

ការពន្យារពេលនៃការរីករាលដាលវីរុសកូវីដ-១៩ និងភាពយឺតយ៉ាវនៃការបែងចែកវ៉ាក់សាំងកូវីដ-១៩ នៅតែបន្តភាពភ័យខ្លាចដល់សាធារណជន និងម្យ៉ាងវិញទៀត អាចនឹងនៅតែបន្តប៉ះពាល់ដល់ការរីកចម្រើនសេដ្ឋកិច្ចជាសកល រួមទាំងកម្ពុជាផងដែរ។

ការអនុលោមជាមួយនឹងរបាយការណ៍ហិរញ្ញវត្ថុ តាមស្តង់ដារបាយការណ៍ហិរញ្ញវត្ថុអន្តរជាតិនៃកម្ពុជា ជាការទាមទារឲ្យមានប្រព័ន្ធដ៏ជឿនលឿន បទប្បញ្ញត្តិ និងគោលការណ៍ណែនាំនៅគ្រប់កាលៈទេសៈតម្រូវ។ ធនាគារបានអភិវឌ្ឍដោយជោគជ័យ ហើយយើងខ្ញុំរីករាយនឹងចែករំលែកវា សម្រាប់ភាគីពាក់ព័ន្ធ។

ខ្ញុំសូមថ្លែងអំណរគុណយ៉ាងជ្រាលជ្រៅ ចំពោះការគាំទ្ររបស់អតិថិជន ក្រុមប្រឹក្សាភិបាល ថ្នាក់គ្រប់គ្រង និងបុគ្គលិក ជាពិសេសរាជរដ្ឋាភិបាល ធនាគារជាតិនៃកម្ពុជា និងនិយ័តករមូលបត្រកម្ពុជា ក្នុងឆ្នាំ២០២០ និងការចូលរួមប្រកបដោយសោមនស្ស និងឧត្តុង្គឧត្តមក្នុងឆ្នាំ២០២១។

បណ្ឌិត អ៊ិន ចាន់នី
ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី
ថ្ងៃទី២៤ ខែមីនា ឆ្នាំ២០២១

របាយការណ៍​ប្រធាន​នាយក​ប្រតិបត្តិ